សកម្មជនការពារបរិស្ថានអាឡិច ហ្កោនសាឡេសបានសម្តែងក្តីសង្ឃឹមថា អ្នកដែលបានទៅទស្សនាតំបន់អារ៉ែងខ្លះនឹងក្លាយជាសកម្មជនជួយការពារបរិស្ថាននិងធនធានធម្មជាតិក្នុងប្រទេសកម្ពុជា។
លោកអាឡិច ហ្កោនសាឡេស សហស្ថាបនិកអង្គការមាតាធម្មជាតិបានបញ្ជាក់ក្នុងកម្មវិធីហេឡូវីអូអេពិសេសកាលពីថ្ងៃពុធដើម្បីប្រារព្ធខួបលើកទី៤៥ឆ្នាំនៃទិវាការពារភពផែនដីថា៖
«ខ្ញុំសង្ឃឹមថាក្រុមយុវជនដែលកំពុងតែទៅអារ៉ែងមួយចំនួនប្រហែល១០ភាគរយឬក៏២០ភាគរយអនាគតក្លាយជាសកម្មជនព្រៃឈើដ៏ខ្លាំងបំផុតដូច្នេះយើងស្វាគមន៍។ ប៉ុន្តែខ្ញុំសង្ឃឹមថាក្នុងពេលឆាប់ៗនេះយើងអាចសហការគ្នាជាមួយរដ្ឋបាលព្រៃឈើដើម្បីរៀបចំប្រព័ន្ធឱ្យច្បាស់លាស់មិនមែនដើម្បីជួញដូរឈើប្រណិតកន្លងមកគឺរៀបចំប្រព័ន្ធដើម្បីស្វាគមន៍ភ្ញៀវជាពិសេសខ្មែរដើម្បីឱ្យតំបន់អារ៉ែងក្លាយជាតំបន់ដែលចូលបេះដូងជនជាតិខ្មែរទាំងអស់គ្នា»។
តំបន់អារ៉ែងដែលស្ថិតនៅក្នុងស្រុកថ្មបាំង ខេត្តកោះកុង បានក្លាយជាចំណុចចាប់អារម្មណ៍នៅថ្នាក់ជាតិនិងអន្តរជាតិបន្ទាប់ពីរដ្ឋាភិបាលកម្ពុជាមានបំណងសាងសង់ទំបន់វារីអគ្គិសនីប៉ុន្តែត្រូវបានប្រជាពលរដ្ឋនៅ សហគមន៍នោះបដិសេធនិងតវ៉ាជាច្រើន។
លោកអាឡិច ហ្កោនសាឡេស ដែលត្រូវរដ្ឋាភិបាលបណ្តេញចេញពីប្រទេសកម្ពុជាដោយសារតែបានចូលរួមការតវ៉ានោះ កំពុងធ្វើដំណើរនៅសហរដ្ឋអាមេរិកដើម្បីស្វះស្វែងរកការគាំទ្របន្ថែមទៀតសម្រាប់ពង្រីកយុទ្ធនាការ ក៏ដូចជាថ្លែងអំណរគុណចំពោះការគាំទ្រកន្លងមកនិងស្តាប់យោបល់ពីពលរដ្ឋខ្មែរដែលរស់នៅក្រៅប្រទេស។
លោកក៏ខិតខំរកវិធីដើម្បីឱ្យបានវិលត្រឡប់ចូលទៅប្រទេសកម្ពុជាវិញដែរ៖
«ខ្ញុំសង្ឃឹមថាក្នុងពេលឆាប់ៗខ្ញុំអាចមានផ្លូវដើម្បី ត្រឡប់ទៅប្រទេសខ្មែរវិញទោះបីពេលគេបណ្តេញគេវាយត្រាទៅលើប៉ាស្ព័រ ហើយក្នុងត្រាហ្នឹងគេសរសេរថាហាមចូលប្រទេសកម្ពុជាក៏ដោយក៏ខ្ញុំសង្ឃឹមថាខ្ញុំអាចត្រឡប់ទៅផ្ទះវិញ។ យើងនិយាយថាផ្ទះចុះព្រោះនៅខ្មែរជាង១០ឆ្នាំខ្ញុំក្លាយទៅជាជនជាតិខ្មែរមួយរូប»។
ជាសកម្មជនជាតិអេស្ប៉ាញហើយបានរស់នៅប្រទេសកម្ពុជាជាង១០ឆ្នាំនិងចំណាយពេលបីឆ្នាំចុងក្រោយធ្វើសកម្មភាពការពារបរិស្ថានយ៉ាងខ្លាំងលោកអាឡិចបានសម្តែងការអស់សង្ឃឹមនឹងការងាររបស់រដ្ឋបាលព្រៃឈើនិងក្រសួងបរិស្ថានដែលលោកចាត់ទុកថា«បរាជ័យ»ក្នុងការការពារធនធានធម្មជាតិ។
«ការងាររបស់គេបានបរាជ័យ។ យុទ្ធសាស្រ្តរូបមន្តរបស់គេគឺបរាជ័យដូច្នេះល្មមយើងដូរយុទ្ធសាស្រ្តដើម្បីធ្វើម៉េចឱ្យការងារយើងមានប្រសិទ្ធភាព។ ប្រសិនបើអនាគតឃើញរដ្ឋបាលព្រៃឈើធ្វើការល្អចេញពីបេះដូងអត់ពុករលួយដូចរាល់ថ្ងៃយើងអាចសហការជាមួយគេបានដោយសារតែយើងជាអ្នកដែលស្រឡាញ់ធនធានធម្មជាតិដែរ»។
ចាប់តាំងពីបណ្តេញចេញពីប្រទេសកម្ពុជាមកលោកអាឡិចត្រូវធ្វើការពីប្រទេសក្រៅក្នុងការទំនាក់ទំនងជាមួយនឹងសកម្មជននានា។លោកយល់ថាការងាររបស់ក្រុមមាតាធម្មជាតិដែលលោកបានចូលរួមបង្កើតកំពុងមានសកម្មភាពខ្លាំងហើយបញ្ហាតំបន់អារ៉ែងលែងសូវក្តៅ ដូចមុនទៀតហើយប៉ុន្តែលោកលើកទឹកចិត្តឱ្យមានការចូលរួមរបស់យុវជនដទៃទៀតក្នុងការជួយទប់ស្កាត់សកម្មភាពល្មើសដទៃទៀតដូចជាការបូមខ្សាច់លក់ជាដើម។
លោកអាឡិចបានបន្ថែមថា៖
«ខ្ញុំសូមអង្វរនិងសូមអំពាវនាវឱ្យយើងទាំងអស់គ្នាជាពិសេសយុវជនបំបាត់ភាពភ័យខ្លាចពីក្នុងខ្លួនព្រោះអ្វី ដែលយើងកំពុងធ្វើជារឿងត្រឹមត្រូវ១០០ភាគរយ។ យើងកំពុងតែការពារធនធានធម្មជាតិប្រយោជន៍យើងទាំងអស់គ្នា ប្រយោជន៍ក្មេងជំនាន់ក្រោយ ប្រយោជន៍មនុស្សជាតិដូច្នេះអត់មានអ្វីដែលគួរឱ្យភ័យខ្លាចទេមានតែត្រូវតែក្លាហានជាងមុនទៅទៀត»។
សកម្មជនការពារបរិស្ថានរូបនេះក៏បានជួបជាមួយនឹងអ្នកតំណាងរាស្រ្តរបស់សហរដ្ឋអាមេរិកផងដែរដើម្បីពិភាក្សានិងសុំអន្តរាគមន៍លើការងារថែរក្សាធនធានធម្មជាតិក្នុងប្រទេសកម្ពុជា៕
