នៅក្នុងសប្តាហ៍ទីពីរនៃខែមីនាក្រុមប៉ូលិសនៅក្នុងប្រទេសបង់ក្លាដែសបានប្រកាសផែនការស្វែងចាប់ខ្លួនក្រុមជ្រុលនិយមខាងសាសនាថែមទៀតដែលប្រហែលបានដឹងអំពីការធ្វើឃាតកាលពីខែកុម្ភៈនៃអ្នកសរសេរអត្ថបទក្នុងបណ្តាញអ៊ិនធឺណិតសញ្ជាតិអាមេរិកាំងដើមកំណើតបង់ក្លាដែសដ៏ល្បីឈ្មោះម្នាក់។
លោក Avijit Roy បានត្រូវសម្លាប់នៅក្នុងការវាយប្រហារមួយដោយកាំបិតដងខ្លីផ្លែវែងនៅក្នុងក្រុងដាក្កា (Dhaka) កាលពីថ្ងៃទី២៦ខែកុម្ភៈនៅពេលលោកទៅលេងប្រទេសនេះ។ ក្រុមប៉ូលិសបានចាប់ខ្លួនសកម្មជនអ៊ីស្លាមជ្រុលនិយមម្នាក់ដែលកាលពីឆ្នាំទៅមិញបានគំរាមកំហែងលោក Roy ថាលោកនឹងត្រូវធ្វើឃាតនៅពេលលោកវិលត្រទ្បប់មកប្រទេសបង់ក្លាដែស។
ក្រុមប៉ូលិសក្រុងដាក្កាបាននិយាយកាលពីសប្តាហ៍ទីពីរនៃខែមីនាថាពួកគេបានរៀបចំផែនការដើម្បីចាប់ខ្លួនសកម្មជន១០នាក់ទៀតដែលប្រហែលបានញុះញង់ឱ្យមានការសម្លាប់អ្នកសរសេរអត្ថបទក្នុងអ៊ិនធឺណិតរូបនេះ។
ក្រុមអ្នកស៊ើបអង្កេតមួយក្រុមមកពីការិយាល័យស៊ើបអង្កេត FBI របស់ស.រ.អា.បានធ្វើដំណើរទៅដល់ប្រទេសបង់ក្លាដែសកាលពីសប្តាហ៍ទីមួយនៃខែមីនាដើម្បីស៊ើបអង្កេតអំពីការសម្លាប់អ្នកសរសេរប្លុកនេះដោយធ្វើកិច្ចសហប្រតិបត្តិការជាមួយក្រុមប៉ូលិសក្នុងមូលដ្ឋាន។
អ្នកស្រី Rafida Ahmed ដែលជាភរិយាលោក Roy និងជាអ្នកសរសេរអត្ថបទតាមអ៊ិនធឺណិតដែរនោះហើយដែលបានត្រូវរបួសនៅក្នុងការវាយប្រហារនោះ បាននិយាយថាក្រុមប៉ូលិសមិនធ្វើសកម្មភាពទេទោះណាជាពួកគេមានវត្តមាននៅនឹងកន្លែងកើតហេតុក៏ដោយ។ អ្នកស្រីក៏បាននិយាយដែរថាអ្នកស្រីអាចបង្ហាញមុខអ្នកធ្វើការវាយប្រហារបានប្រសិនបើអ្នកស្រីឃើញពួកគេទៀត។
នៅក្នុងសេចក្តីសម្ភាសន៍មួយតាមទូរស័ព្ទជាមួយវីអូអេ លោក Ajoy Roy ដែលជាឪពុកលោក Avijit Roy ដែលជាសាស្ត្រាចារ្យសាកលវិទ្យាល័យចូលនិវត្តន៍បាននិយាយថាកូនប្រុសលោកជាអ្នកគោរពទឹ្រស្តីមនុស្សនិយម (Humanism) ម្នាក់មិនយកសាសនាជាធំហើយបានត្រូវធ្វើឃាតដោយក្រុមអ្នកកាន់សាសនាអ៊ីស្លាមនិយមដោយសារអត្ថបទដែលលោកសរសេរ។
លោក Ajoy Roy បាននិយាយថា «ការគំរាមកំហែងដល់ជីវិតពីក្រុមជ្រុលនិយមខាងសាសនាទាំងនោះនៅក្នុងហ្វេសបុក និងតាមអ៊ីម៉ែលបញ្ជាក់ថាពួកគេខឹងសំបារនឹងអត្ថបទដែល Avijit សរសេរ។ ខ្ញុំប្រាកដក្នុងចិត្តថាពួកគេបានតាមឃ្លាំមើល Avijit។ ពួកគេមានឱកាសនៅពេលនេះហើយក៏បានសម្លាប់ Avijit ទៅ»។
ពីរថ្ងៃក្រោយការធ្វើឃាតកូនប្រុសគាត់ លោក Ajoy Roy បាននិយាយថាលោកបានទទួលការហៅទូរស័ព្ទមួយពីលោកស្រីនាយករដ្ឋមន្ត្រី Sheikh Hasina ដែលបានធានារ៉ាប់រងប្រាប់លោកថាទីភ្នាក់ងារលោកស្រីនឹងខិតខំប្រឹងប្រែងខ្លាំងបំផុតដើម្បីចាប់ខ្លួនក្រុមឃាតកទាំងនេះ។
លោក Ajoy Roy ដែលជាអតីតសាស្ត្រាចារ្យអាយុ៨០ឆ្នាំបាននិយាយថា «ដោយមានការចូលរួមនៃ ក្រុម FBI ខ្ញុំសង្ឃឹមថាការស៊ើបអង្កេតនឹងមានដំណើរការល្អហើយអ្នកប្រព្រឹត្តល្មើសក្នុងឧក្រិដ្ឋកម្មនេះនឹងត្រូវនាំខ្លួនទ្បើងតុលាការ»។
លោក Ajoy Roy បាននិយាយទៀតថា «Avijit ជាអ្នកគ្មានសាសនាទេ។ នៅក្នុងសៀវភៅនិងអត្ថបទឯទៀតៗដែលកូនខ្ញុំសរសេរ គេបានថ្កោលទោសវិធីបដិបត្តសាសនានៅក្នុងពិភពលោក។ កូនខ្ញុំក៏សរសេរប្រឆាំងនឹងព្រហ្មញ្ញសាសនាដែរ»។
អ្នកប្រើប្រាស់បណ្តាញផ្សាយព័ត៌មានសង្គមខ្លះដែលបានតាមមើលសកម្មភាពរបស់លោក Avijit Roy ដែលមានអាយុ៤០ឆ្នាំតាមបណ្តាញអ៊ិនធឺណិតកត់សម្គាល់ថាអ្នកសរសេរប្លុកនេះក៏មានសត្រូវដែរក្នុងចំណោមក្រុមសកម្មជនក្នុងក្រុមប្រឆាំងនិងពីគណបក្សគ្រប់គ្រងប្រទេសនៅក្នុងប្រទេស បង់ក្លាដែស។ លោក Avijit Roy ដែលចាត់ចែងប្លុកមួយមានឈ្មោះថា «Mukto-Mona» ដែលមានន័យថាផ្នត់គំនិតសេរីជាភាសា Bengali បានត្រូវស្គាល់ដោយសារការសរសេររបស់លោកអំពីទស្សនវិជ្ជា សិទ្ធិមនុស្ស និងការរិះគន់ដល់ភាពជ្រុលនិយមខាងសាសនានិងដល់រដ្ឋាភិបាល។ អ្នកសរសេរប្លុកមិនជឿសាសនានេះក៏បានសរសេរអត្ថបទក្នុងគេហទំព័រនៃ «មជ្ឈមណ្ឌលនៃការរុករក»ដែលភាសាអង់គ្លេសហៅថា «Center for Inquiry» ដែលជាអង្គការមួយដែលគេស្គាល់ថាបានរិះគន់សាសនានិងឧបត្ថម្ភផ្ចុងផ្តើមទ្រឹស្តីមនុស្សនិយម។
ក្រុមអ៊ីស្លាមនិយមដូចជាក្រុម Hefazat-e-Islam និងក្រុម Jammat-e-Islami ជាដើមបានចោទប្រកាន់លោក Avijit Roy ថាប្រមាថមើលងាយសាសនាដោយថាលោកបានប្រមាថព្យាការី Muhammad និងបង្ខូចកេរ្តិ៍ឈ្មោះសាសនាអ៊ីស្លាមនិងគម្ពីរ Quran។
នៅក្រោយពីលោកបានចេញផ្សាយសៀវភៅមួយរបស់លោកដែលលក់ដាច់ច្រើនកាលពីឆ្នាំ២០១៤ស្តីពីភាពប្រកាន់ជ្រុលតាមគម្ពីរសាសនាមានចំណងជើងថា «វីរុសនៃជំនឿសាសនា» លោកបានចាប់ផ្តើមទទួលការគំរាមកំហែងតាមអ៊ិនធឺណិតពីក្រុមអ៊ីស្លាមនិយម។
កាលពីឆ្នាំទៅមិញ បណ្ណាគារមួយលក់សៀវភៅតាមអ៊ិនធឺណិតបានឈប់លក់សៀវភៅរបស់លោក Avijit Roy នៅក្រោយពីបានទទួលការគំរាមកំហែងដល់ជីវិតតាមហ្វេសបុករបស់ខ្លួន។ នៅក្នុងឆ្នាំ២០១៤ដែរ Shafiur Rahman Farabi អ្នកអ៊ីស្លាមនិយមម្នាក់នៅក្នុងប្រទេស បង់ក្លាដែស បានសរសេរនៅក្នុងហ្វេសបុកថា «Avijit Roy រស់នៅក្នុងប្រទេសអាមេរិក ដូច្នេះមិនអាចសម្លាប់គាត់បានទេនៅពេលនេះ។ គាត់នឹងត្រូវសម្លាប់នៅពេលគាត់វិលត្រទ្បប់មកវិញ»។
Farabi បានត្រូវចាប់ខ្លួនថាជាជនជាប់សង្ស័យនៅក្នុងការធ្វើឃាតលោក Rajib Haider ដែលជាអ្នកសរសេរប្លុកកាលពីឆ្នាំ២០១៣។ គាត់ក៏បានគំរាមកំហែងដល់ Imam ណាដែលដឹកនាំការសូត្រធម៌ក្នុងពិធីបុណ្យសពអ្នកសរសេរប្លុកដែលបានត្រូវសម្លាប់នេះ។ នៅពេលបន្ទាប់មកគាត់បានត្រូវដោះលែងដោយបានបង់ប្រាក់ធានានៅក្រៅឃុំ។
ក្រុមប៉ូលិសសង្ស័យថា Farabi និងក្រុមសកម្មជនលម្អៀងទៅខាងអ៊ីស្លាមនិយមដប់នាក់ទៀតប្រហែលបានញុះញង់ឱ្យមានការធ្វើឃាតកាលពីពេលថ្មីបំផុតនេះ។ Farabi បានត្រូវចាប់ខ្លួនដោយមានទាក់ទិននឹងឃាតកម្មនេះ ក៏ប៉ុន្តែគាត់បាននិយាយប្រាប់ប៉ូលិសថាគាត់មិនបានវាយប្រហារលោក Roy កាលពីថ្ងៃទី២៦ខែកុម្ភៈទេ។ ក្រុមប៉ូលិសសង្ឃឹមថានឹងចាប់ខ្លួនសកម្មជនឯទៀតៗក្នុងពេលឆាប់ៗនេះ។
កាលពីខែវិច្ឆិកា នៅក្នុងអត្ថបទបញ្ចេញមតិមួយក្នុងគេហទំព័រ bbnews24.com ដែលជាគេហទំព័រខាងព័ត៌មានមួយនៅក្នុងប្រទេសបង់ក្លាដែស លោក Avijit Roy បានរិះគន់ក្រុម Hindu ជ្រុលនិយមអំពីជំនឿពួកគេថាទ្រឹស្តីវិទ្យាសាស្ត្រនិងបច្ចេកទេសជាច្រើនមានដើមកំណើតនៅក្នុងគម្ពីរវេទបូរាណរបស់សាសនា Hindu។
លោកក៏បានរិះគន់ដែរដល់គណបក្ស Awami League គ្រប់គ្រងប្រទេសបង់ក្លាដែស និងរដ្ឋាភិបាលដឹកនាំដោយលោកស្រី Hasina អំពីបញ្ហាមួយចំនួន។
គេបានឃើញការវាយប្រហារដ៏ឃោរឃៅមួយចំនួនប្រឆាំងនឹងក្រុមអ្នកសរសេរប្លុកមិនជឿសាសនានៅក្នុងប្រទេសបង់ក្លាដែស។
កាលពីឆ្នាំ២០០៤ លោក Humayun Azad សាស្ត្រាចារ្យសាកលវិទ្យាល័យដាក្កាដែលគេស្គាល់លោកដោយសារអត្ថបទដែលលោកសរសេរមានភាពសេរីនិយមនិងមិនយកសាសនាជាធំបានត្រូវវាយប្រហារដោយត្រូវកាប់រហូតដល់ស្លាប់ដោយជនសកម្មប្រយុទ្ធ។ លោកបានស្លាប់នៅពេលបន្ទាប់នៅពេលលោកទទួលការព្យាបាលក្នុងប្រទេសអាល្លឺម៉ង់។
ក្នុងឆ្នាំ២០១៣ លោក Asif Mohiuddin អ្នកសរសេរប្លុកបានត្រូវចាក់ក្នុងក្រុងដាក្កា ក៏ប៉ុន្តែលោកបាននៅរស់ពីការវាយប្រហារនេះ។ នៅក្នុងឆ្នាំនោះដែរ បុរសខ្លះដែលខឹងសំបារនឹងប្លុករបស់លោក Rajib Haider បានសម្លាប់លោកនៅក្នុងក្រុងដាក្កា។
នៅក្នុងករណីឃាតកម្មទាំងបីនេះ គ្មានអ្នកវាយប្រហារណាម្នាក់ដែលគេស្គាល់អត្តសញ្ញាណបានត្រូវជាប់ឃុំឃាំងទេ៕
ប្រែសម្រួលដោយ ឈឹម សុមេធ
