ពលរដ្ឋខ្មែរក្នុងប្រទេសបារាំងសម្តែងមតិចម្រុះគ្នា បន្ទាប់ពីមានការវាយប្រហារភេរវកម្មកាលពីថ្ងៃពុធក្នុងទីក្រុងប៉ារីស។ ថ្វីបើពួកគេមានក្តីបារម្ភខ្លះៗមែន តែពលរដ្ឋខ្មែរនិងពលរដ្ឋបារាំងបង្ហាញការជឿទុកចិត្តដល់អាជ្ញាធរក្នុងការស្រាវជ្រាវនិងតាមប្រមាញ់ក្រុមភេរវករ។
ការវាយប្រហារភេរវកម្មផ្តាច់ផ្តិលជីវិតក្នុងក្រុងប៉ារីសដោយខ្មាន់កាំភ្លើងបិទមុខមួយក្រុមបានធ្វើឲ្យមានការភ្ញាក់ផ្អើលនិងបារម្ភខ្លះៗអំពីសន្តិសុខ សុវត្ថិភាពពីក្រុមពលរដ្ឋកម្ពុជាមួយចំនួនដែលកំពុងរស់នៅក្នុងតំបន់ជាច្រើនក្នុងប្រទេសបារាំង។
ការវាយប្រហារកាលពីថ្ងៃពុធកណ្តាលថ្ងៃត្រង់លើការិយាល័យទស្សនាវដ្តី Charlie Hebdo ជាទស្សនាវដ្តីរូបត្លុកលេបខាយផ្នែកសាសនានោះ បានសម្លាប់មនុស្សភ្លាមៗចំនួន១២នាក់ រួមទាំងអ្នកកាសែតគូររូបភាពត្លុកល្បីៗ ពលរដ្ឋ ហើយនឹងប៉ូលិសផងដែរ។
លោកសុខ សុផាត ជាពលរដ្ឋខ្មែរបារាំងម្នាក់ មានស្រុកកំណើតនៅខេត្តតាកែវ បច្ចុប្បន្នរស់នៅក្នុងទីក្រុងប៉ារីស ចម្ងាយ១៥ទៅ២០គ.ម.ពីកន្លែងកើតហេតុក្នុងសង្កាត់លេខ១១។ លោកបានអះអាងថា រឿងនេះមិនមែនជាការភ្នាក់ផ្អើលខ្លាំងណាស់ណាទេ។ តែជាការល្អ គេត្រូវប្រយ័ត្នក្នុងពេលធ្វើដំណើរ។
«ម្នាក់ៗកើតឡើងនាំគ្នាខឹងសម្បារ តែអត់មានការផ្លាស់ប្តូរក្នុងការរស់នៅរបស់ខ្ញុំ របស់ប្រពន្ធខ្ញុំ របស់កូនខ្ញុំ តែម្នាក់ឲ្យប្រយ័ត្ន ជាពិសេសឲ្យប្រយ័ត្ននៅពេលដែលមានការជួបជុំគ្នា»។
លោកថ្លែងដូច្នេះដោយយោងថា ក្រុមភេរវករនេះអាចចាប់មនុស្សធ្វើជាចំណាប់ខ្មាំង ឬធ្វើអ្វីមួយតាមការបង្ខំរបស់គេ។
លោកអ៊ឹង សំអោក មានស្រុកកំណើតក្នុងខេត្តកណ្តាល មករស់នៅក្នុងក្រុងប៉ារីស ប្រទេសបារាំងនៅឆ្នាំ១៩៨២ ជិតកន្លែងកើតហេតុក្នុងចម្ងាយផ្លូវបើកឡាន១៥នាទី។ លោកបានថ្លែងថា ចរាចមានការបើកឲ្យដើរចេញចូលជាធម្មតា គ្មានការរិតបន្តឹងសន្តិសុខក្នុងការដើរហើរទេ។ គេមានការរិតត្បិតមិនឲ្យឆ្លងកាត់តែកន្លែងមួយ ដែលកើតហេតុកាលពីថ្ងៃពុធតែប៉ុណ្ណោះ។
«យើងមិនមានការបារម្ភអ្វីខុសពីគេទេ ព្រោះយើងនឹកគិត និងមានអារម្មណ៍ថា ទោះជាយ៉ាងណាប៉ូលិស ការពារប្រជាពលរដ្ឋ ហើយមានសាមគ្គីភាពរវាងគ្នានឹងគ្នា។ ដូច្នេះយើងអត់មានអារម្មណ៍អីប្លែកថា យើងជាជនបរទេស យើងខ្លាចអញ្ចេះ អញ្ចុះ អត់មានទេ គ្រាន់តែថា យើងត្រូវប្រយ័ត្ន»។
លោក សេង ហ៊ល ពលរដ្ឋខ្មែរក្នុងស្រុកបារាំងម្នាក់ទៀតដែលមកដល់ស្រុកបារាំងតាំងពីឆ្នាំ១៩៧៩។ លោកមានស្រុកកំណើតនៅរាជធានីភ្នំពេញ។ លោកបានថ្លែងថា ការបារម្ភខ្លះរបស់លោកមិនអាចប៉ះទង្គិចដល់សកម្មភាពរស់នៅរបស់លោកនោះទេ។
«អត់មានតឹងតែងអីទេ តែខាងប៉ូលិស ខាងទាហានអីហ្នឹង គេនៅបន្តរក្សាសន្តិសុខ សណ្តាប់ធ្នាប់ របៀបរៀបរយ ជាពិសេសនៅទីកន្លែងសាធារណៈសំខាន់ៗទូទៅ»។
ទោះជាមានការសង្ស័យពីរឿងជាច្រើនថា ការវាយប្រហារនេះអាចមានជាប់ពាក់ព័ន្ធនឹងរឿងសាសនា និងរឿងនយោបាយប្រទេសបារាំងក្នុងសង្គ្រាមប្រឆាំងនឹងពួកក្រុមឧទ្ទាមរដ្ឋឥស្លាម (ISIS) នៅក្នុងប្រទេសស៊ីរី និងអ៊ីរ៉ាក់ក្តី តែពលរដ្ឋបារាំងដើមកំណើតខ្មែរគ្រាន់តែបានធ្វើការកត់សម្គាល់អំពីរឿងនោះ ដែលគេផ្សព្វផ្សាយតាមបណ្តាញព័ត៌មាន ដោយមិនធ្វើអាត្ថាធិប្បាយអំពីរឿងនេះទេ។
ពីទីក្រុងលីយ៉ុងស្ថិតក្នុងចម្ងាយផ្លូវជិត៥០០គីឡូម៉ែត្រ ពលរដ្ឋខ្មែរម្នាក់ទៀតគឺលោកលី ពឿង មកដល់ប្រទេសបារាំងកាលពីឆ្នាំ១៩៨៥។ លោកកំពុងធ្វើការក្នុងក្រុមហ៊ុនផ្តល់សេវាកម្មទំនិញទៅប្រទេសអឺរ៉ុបផ្សេងៗ ហើយជាអនុប្រធានវិទ្យុផ្នែកខេមរភាសាមួយក្នុងទីក្រុងលីយ៉ុងផងដែរ។ លោកបានថ្លែងថា ដំណើរការសេវាកម្មនិងសកម្មភាពរស់នៅរបស់ពលរដ្ឋគឺនៅធម្មតា។ តែលោកថា សម្រាប់ពលរដ្ឋខ្មែរដែលឆ្លងកាត់របបកាប់សម្លាប់ខ្មែរក្រហម ដូចរូបលោក ហាក់ដូចជាស៊ាំនឹងស្ថានការណ៍នេះទៅហើយ។
«យើងអត់មានការភ្ញាក់ផ្អើលដ៏គួរឲ្យអស្ចារ្យទេ ព្រោះថា នៅស្រុកគេនេះមានរឿងអីបន្តិច ទូរទស្សន៍គេផ្សាយគ្រប់កន្លែង។ គេដឹង។ យើងតែងតែប្រយ័ត្ននៅទីប្រជុំជន ជាពិសេស យើងមិនសូវចូលទៅក្នុងទីប្រជុំជនតែប៉ុណ្ណឹងទៅវាអត់មានបញ្ហាទេ»។
ចំពោះបញ្ហាសន្តិសុខវិញ លោកថា គេមានដាក់ការយាមកាមធម្មតា តែមិនបានដាក់បម្រាមគោចរនោះទេ។ លោកថា មានការរិតបន្តឹងសន្តិសុខនៅតាមកន្លែងស្ថានីយរថយន្តធំៗ ស្ថានីយរថភ្លើង កន្លែងធ្វើការរដ្ឋខ្លះ ហើយនឹងទីប្រជុំជននានា តែមិនប៉ះពាល់ដល់កន្លែងធ្វើការជាទូទៅទេ។
លោកថ្លែងថា កោតសរសើរដល់រដ្ឋាភិបាលបារាំងថា គេនឹងបញ្ចប់ការស្រាវជ្រាវបញ្ហានេះក្នុងរយៈពេលឆាប់ៗនេះ ដោយមិនទុកឲ្យស្ថានការណ៍វឹកវរនេះនៅបន្តរហូតទេ។
«ហើយខ្ញុំជឿថា ប្រទេសគេមិនមានការដែលគួរឲ្យពិបាកនឹងគិតទេព្រោះថា អ្វីដែលកើតឡើងតែមួយបព្រិចភ្នែក គេបំបាត់ទៅវិញ ជួនកាលដោយសន្តិវិធី ជួនកាលដោយអំពើអ្វីមួយគឺយកច្បាប់យកទៅប្រើ»។
ពលរដ្ឋបារាំងពាសពេញប្រទេសត្រូវគេឃើញថា បានចេញមកប្រមូលផ្តុំតាមដងផ្លូវដើម្បីប្រាព្ធពិធីស្មឹងស្មាធដើម្បីសម្តែងមរណទុក្ខដល់អ្នកកាសែតល្បីៗ និងជនរងគ្រោះ ដែលបានស្លាប់ក្នុងការវាយប្រហារដោយអំពើភេរវកម្ម ដែលត្រូវមេដឹកនាំពិភពលោក រួមទាំងលោកប្រធានាធិបតីស.រ.អា.បានថ្កោលទោសផងនោះ។
មន្ត្រីបារាំងនិយាយថា មនុស្ស៧នាក់ត្រូវចាប់ខ្លួននៅក្នុងពេលកំពុងតាមរកជនសង្ស័យដ៏សំខាន់ពីរនាក់ក្នុងការបាញ់ប្រហារកាលពីថ្ងៃពុធ ដែលបានសម្លាប់មនុស្ស១២នាក់នៅការិយាល័យទស្សនាវដ្តី Charlie Hebdo នៅទីក្រុងប៉ារីស។
លោកនាយករដ្ឋមន្ត្រី Manuel Valls បានប្រាប់អ្នកយកព័ត៌មានកាលពីថ្ងៃព្រហស្បតិ៍ថា ជនសង្ស័យពីរនាក់នោះត្រូវបានផ្នែកស៊ើបការណ៍សម្ងាត់ស្គាល់អត្តសញ្ញាណហើយ។ លោកនាយករដ្ឋមន្ត្រីថ្លែងថា ជនទាំងពីរនោះធ្វើសកម្មភាពដូចជាទាហាន។
ប៉ូលិសកំពុងស្រាវជ្រាវរកបងប្អូនប្រុសឈ្មោះ Said Kouachi និង Cherif Kouachi ដែលគេសង្ស័យថា ជាអ្នកវាយប្រហារភេរវកម្មកាលពីថ្ងៃពុធ។
ជនទាំងពីរនេះជាអ្នករស់នៅក្រុងប៉ារីស អាយុប្រមាណ៣០ឆ្នាំ ហើយ Cherif ធ្លាប់បានជាប់ពន្ធនាគារពីបទភេរវកម្ម។ អាជ្ញាធរបារាំងនិយាយថា ជនទាំងនោះប្រដាប់ដោយអាវុធ អាចបង្កគ្រោះថ្នាក់។
ក្នុងព្រឹត្តិការណ៍បាញ់ប្រហារមួយផ្សេងទៀត មន្ត្រីប៉ូលិសនៅទីក្រុងប៉ារីសនិយាយថា ប៉ូលិសស្រ្តីម្នាក់បានស្លាប់ដោយសារជនល្មើសបាញ់នៅថ្ងៃព្រហស្បតិ៍នេះ នៅភាគខាងត្បូងទីក្រុងប៉ារីស។ គេនៅមិនទាន់ដឹងនៅឡើយថា តើការបាញ់ប្រហារនៅថ្ងៃព្រហស្បតិ៍នេះទាក់ទងនឹងការតាមរកជនសង្ស័យក្នុងការបាញ់ប្រហារនៅ Charlie Hebdo នោះឬយ៉ាងណាទេ។
តែពលរដ្ឋខ្មែរក្នុងប្រទេសបារាំងបានថ្លែងថា ពួកគេបង្វែការចាប់អារម្មណ៍ខ្លាំងទៅតាមខេត្ត ដោយសារកើតមានការបាញ់សម្លាប់ផ្តាច់ផ្តិលជីវិតមួយករណីទៀត ហើយជួនគ្នានឹងក្រុមភេរវករពីរនាក់ត្រូវគេដឹងថា កំពុងរត់ចេញទៅខេត្តឆ្ងាយពីក្រុងបារីស។
អាជ្ញាធរបានឃុំខ្លួនជនសង្ស័យម្នាក់ឈ្មោះ Hamyd Mourad អាយុ១៨ឆ្នាំដែលបានប្រគល់ខ្លួនឲ្យអាជ្ញាធរ ក្រោយមានការបាញ់ប្រហារកាលពីថ្ងៃពុធ៕
