រដ្ឋមន្រ្តីការពារប្រទេសរបស់អាមេរិក Ashton Carter បានសន្យាពង្រីកកិច្ចសហការការពារប្រទេសជាមួយជប៉ុន នៅពេលដែលលោកធ្វើការចរចាជាមួយរដ្ឋមន្រ្តីការពារប្រទេសជប៉ុននៅថ្ងៃពុធនេះក្នុងទីក្រុងតូក្យូ។
លោក Carter កំពុងស្ថិតនៅថ្ងៃទីមួយនៃដំណើរបំពេញទស្សនកិច្ចរយៈពេល៣ថ្ងៃ ក្នុងអំឡុងពេលនោះភាគីទាំង២នឹងធ្វើការចរចាឡើងវិញនូវកិច្ចសហប្រតិបត្តិការការពារប្រទេសរវាងរដ្ឋាភិបាលទីក្រុងវ៉ាស៊ីនតោននិងរដ្ឋាភិបាលទីក្រុងតូក្យូ។
ដំណើរបំពេញទស្សនៈកិច្ចនេះ ក៏មានគោលបំណងផ្តោតលើសម្ព័ន្ធភាពខាងយោធាដ៏យូរអង្វែងរបស់ប្រទេសទាំង២ ដែលជាផ្នែកមួយដ៏សំខាន់នៃការប៉ុនប៉ងរបស់សេតវិមានផ្តោតឡើងវិញដល់អថិភាពរបស់ខ្លួននៅតំបន់អាស៊ី។
ថ្លែងនៅក្បែរឧត្តមសេនីយ៍ Nakatani រដ្ឋមន្រ្តីការពារប្រទេសជប៉ុន លោក Carter បានមានប្រសាសន៍ថា លោកបានតាំងចិត្តពិនិត្យមើលដំណាក់ការបន្ទាប់ ដែលហៅថាការធ្វើឲ្យមានតុល្យភាពឡើងវិញ។
ក្នុងអំឡុងពេលនៃការចរចារបស់លោកជាមួយរដ្ឋមន្រ្តី Nakatani លោក Carter ក៏បាននិយាយដែរថា លោកបានបញ្ជាក់ពីជំហររបស់សហរដ្ឋអាមេរិកលើបញ្ហាប្រជុំកោះសមុទ្រចិនខាងកើតដែលជាជម្លោះដ៏ខ្លាំងជាមួយចិន។
លោកនិយាយថា «ខ្ញុំបញ្ជាក់ឡើងវិញថា ការតាំងចិត្តនៅខែកក្កដា ឆ្នាំ២០១៤របស់ប្រធានាធិបតីបារ៉ាក់ អូបាម៉ាដើម្បីអនុវត្តសន្ធិសញ្ញាសន្តិសុខរបស់យើងដល់តំបន់ទាំងអស់នៅក្រោមរដ្ឋបាលរបស់ជប៉ុន ហើយនិងការបន្តជំទាស់ប្រឆាំងដ៏ខ្លាំងរបស់យើងដល់សកម្មភាពដោយការបង្ខំឯកតោភាគី ដែលស្វះស្វែងធ្វើឲ្យអន្តរាយដល់ការត្រួតត្រាផ្នែករដ្ឋបាលរបស់ជប៉ុននៅប្រជុំកោះ Senkaku។
កាលពីឆ្នាំទៅ ប្រធានាធិបតីអូបាម៉ាបានបញ្ជាក់ថា សន្ធិសញ្ញាសន្តិសុខរវាងសហរដ្ឋអាមេរិកនិងជប៉ុន អនុវត្តដល់ប្រជុំកោះដែលកាន់កាប់ដោយជប៉ុន ដែលចិនហៅថាកោះ Diaoyu។
ក្នុងប៉ុន្មានឆ្នាំថ្មីៗនេះ ចិនបានប្រឆាំងការត្រួតត្រាប្រជុំកោះគ្មានមនុស្សរស់នៅរបស់ជប៉ុនដោយធ្វើការយាមល្បាតតាមអាកាសនិងនាវានៅជិតទឹកដីមានជម្លោះនោះ៕
