រដ្ឋមន្រ្តីក្រសួងយុត្តិធម៌ និងក្រសួងមហាផ្ទៃនៅអឺរ៉ុបកំពុងបើកកិច្ចប្រជុំពិភាក្សាអំពីវិបត្តិនៅថ្ងៃសុក្រនេះនៅទីក្រុងព្រុចសែល (Brussels) ដើម្បីរកមធ្យោបាយសម្របសម្រួលនិងពង្រឹងការត្រួតពិនិត្យសន្តិសុខនៅតាមព្រំដែនប្រទេសជាសមាជិក ដែលនេះជាការចាត់វិធានការបន្ទាន់ក្រោយពីមានការវាយប្រហារនៅទីក្រុងប៉ារីសកន្លងមកនេះ។
ជំហាននានាត្រូវបានធ្វើឡើងដោយសារមានការបង្ហាញថា មេដឹកនាំការវាយប្រហារឈ្មោះ Abdelhamid Abaaoud ដែលត្រូវបានសម្លាប់នោះបានចូលមកក្នុងបណ្តាប្រទេសនៅអឺរ៉ុប។
រដ្ឋមន្រ្តីក្រសួងមហាផ្ទៃបារាំង គឺលោក Bernard Cazeneuve បានមានប្រសាសន៍ថា៖ «ពុំមានព័ត៌មានបញ្ជាក់ពីប្រទេសណាមួយនៅអឺរ៉ុបអំពីថាតើមេដឹកនាំអំពើភេរវកម្មរូបនោះបានចូលមកក្នុងប្រទេសណាមុនពេលដែលគេបានមកដល់ប្រទេសបារាំងនោះទេ។ រហូតដល់ថ្ងៃទី១៦ ខែវិច្ឆិកា បន្ទាប់ពីមានការវាយប្រហារនៅទីក្រុងប៉ារីស ទើបមានក្រុមការងារស៊ើបការសម្ងាត់របស់ប្រទេសផ្សេងដែលមិនមែនជាប្រទេសនៅអឺរ៉ុបរាយការណ៍មកថា មេដឹកនាំភេរវកម្មរូបនេះបានមានវត្តមាននៅប្រទេសក្រិក»។
ក្រុមប៉ូលិសនៅតែបន្តស្វែងរកចាប់ខ្លួនជនសង្ស័យភេរវកម្មយ៉ាងហោចណាស់ក៏ម្នាក់ទៀតដែរដែលបានរត់គេចខ្លួន ចាប់តាំងពីមានការវាយប្រហារដែលបានបណ្តាលឲ្យមនុស្សជាច្រើនស្លាប់នៅទីក្រុងប៉ារីសកាលពីសប្តាហ៍មុននេះ៕
