ជនជាតិប៉ាឡេស្ទីនជាង ៣០.០០០ នាក់ត្រូវបានសម្លាប់នៅក្នុងតំបន់ហ្កាហ្សា (Gaza) តាំងពីពេលចាប់ផ្ដើមនៃសង្គ្រាមរវាងអ៊ីស្រាអែលនិងក្រុមហាម៉ាស់ (Hamas) ជិត ៥ ខែកន្លងមក ខណៈដែលការវាយប្រហារនៅថ្ងៃព្រហស្បតិ៍នេះលើហ្វូងមនុស្សដែលរង់ចាំជំនួយនៅក្នុងទីក្រុងហ្កាហ្សាបានធ្វើឱ្យមនុស្សជាច្រើនស្លាប់និងរងរបួស។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP ដែលយោងលើការបញ្ជាក់របស់មន្ត្រីសុខាភិបាលតំបន់ហ្កាហ្សា។
មនុស្សយ៉ាងតិច ៧០ នាក់ត្រូវបានសម្លាប់ និង ២៨០ នាក់បានរងរបួស នៅពេលដែលពលរដ្ឋប៉ាឡេស្ទីនជាច្រើនតម្រង់ជួរដើម្បីទទួលជំនួយមនុស្សធម៌។ នេះបើតាមការបញ្ជាក់របស់អ្នកនាំពាក្យក្រសួងសុខាភិបាលតំបន់ហ្កាហ្សាលោក Ashraf al-Qidra។
សង្គ្រាមនេះបានធ្វើឱ្យប្រជាជនប៉ាឡេស្ទីនប្រហែល ៨០% ក្នុងចំណោមប្រជាជនសរុបចំនួន ២,៣ លាននាក់ភៀសខ្លួនពីផ្ទះសម្បែង ហើយមន្ត្រីអង្គការសហប្រជាជាតិបាននិយាយថា ប្រជាជនប្រហែលមួយភាគបួនកំពុងអត់ឃ្លាន។
បន្ទាប់ពីការវាយប្រហារនេះ ក្រសួងសុខាភិបាលតំបន់ហ្កាហ្សាបានបញ្ជាក់ថា ចំនួនប្រជាជនប៉ាឡេស្ទីនដែលបានស្លាប់ដោយសារសង្គ្រាមនៅក្នុងតំបន់ហ្កាហ្សាបានកើនដល់ ៣០.០៣៥ នាក់ និងអ្នករងរបួសមានចំនួន ៧០.៤៥៧ នាក់។ ក្រសួងនេះមិនបានបញ្ជាក់នៅក្នុងតួលេខរបស់ខ្លួននេះថាយុទ្ធជនមានប៉ុន្មាននាក់និងអ្នកដែលមិនមែនជាយុទ្ធជនមានប៉ុន្មាននាក់នោះទេ។ អ៊ីស្រាអែលបានបញ្ជាក់ដោយមិនផ្ដល់ភ័ស្តុតាងថា ខ្លួនបានសម្លាប់ជនសកម្មប្រយុទ្ធ ១០.០០០ នាក់។
សង្គ្រាមនេះបានបង្កឱ្យមានមហន្តរាយមនុស្សធម៌នៅក្នុងតំបន់ហ្កាហ្សា និងបណ្ដាលឱ្យមានក្ដីបារម្ភជាសាកលទាក់ទិននឹងស្ថានការណ៍នៅក្នុងទីក្រុង Rafah នៅភាគខាងត្បូងបំផុតនៃតំបន់ហ្កាហ្សាតាមបណ្ដោយព្រំដែនជាប់នឹងប្រទេសអេហ្ស៊ីប។ នៅក្នុងទីក្រុងនោះ ជនជាតិប៉ាឡេស្ទីនចំនួន ១,៤លាន នាក់បានជ្រកកោនដើម្បីសុវត្ថិភាពពីការបាញ់ផ្លោងរបស់អ៊ីស្រាអែលជារៀងរាល់ថ្ងៃ៕
វេទិកាបញ្ចេញមតិ