ប្រធានអង្គការមូលនិធិរូបិយវត្ថុអន្តរជាតិ (IMF) បានអំពាវនាវកាលពីថ្ងៃទី ២៤ ខែមីនាឱ្យប្រទេសចិនអនុវត្ត «កញ្ចប់កំណែទម្រង់គាំទ្រទីផ្សារគ្រប់ជ្រុងជ្រោយ» ដើម្បីបង្កើនសេដ្ឋកិច្ចដែលបានធ្លាក់ចុះដោយសារវិបត្តិទីផ្សារអចលនទ្រព្យ តម្រូវការក្នុងស្រុកទាប និងអត្រាអត់ការងារធ្វើខ្ពស់របស់យុវជន។
កន្លងមក អ្នកបង្កើតគោលនយោបាយរបស់ប្រទេសចិនបានប្រឆាំងទៅនឹងការអំពាវនាវឱ្យបង្កើនសេដ្ឋកិច្ចតាមរយៈថវិកាជំរុញដ៏ច្រើនរបស់រដ្ឋាភិបាល ហើយផ្ទុយទៅវិញបានសង្កត់ធ្ងន់លើតម្រូវការក្នុងការបោះជំហានទៅរកកំណើនសេដ្ឋកិច្ចដែលមាន «គុណភាពខ្ពស់»។
នាយកគ្រប់គ្រងអង្គការ IMF អ្នកស្រី Kristalina Georgieva បានថ្លែងនៅក្នុងវេទិកាអភិវឌ្ឍន៍ប្រទេសចិននៅក្នុងទីក្រុងប៉េកាំងកាលពីថ្ងៃទី ២៤ ខែមីនាថា៖ «ការផ្លាស់ប្តូរពីកំណើនផ្ដោតលើអត្រាខ្ពស់ទៅកំណើនផ្ដោតលើគុណភាពខ្ពស់គឺជាជម្រើសដែលត្រូវប្រកាន់យក ហើយប្រទេសចិនតាំងចិត្តធ្វើដូច្នេះ»។
អ្នកស្រី Georgieva ដែលជាសេដ្ឋវិទូប៊ុលហ្គារី បានបញ្ជាក់ថា «ការផ្លាស់ប្តូរនេះនឹងមិនងាយស្រួលទេ» ប៉ុន្តែថា «ជាមួយនឹងកញ្ចប់កំណែទម្រង់គាំទ្រទីផ្សារគ្រប់ជ្រុងជ្រោយ ប្រទេសចិនអាចរីកចម្រើនលឿនជាងស្ថានភាពជាក់ស្តែងនៅពេលបច្ចុប្បន្ន»។ នេះបើយោងតាមអត្ថបទសុន្ទរកថាផ្លូវការរបស់អ្នកស្រី។
អ្នកស្រី Georgieva បានថ្លែងថា រដ្ឋាភិបាលចិនគួរតែចាត់ «វិធានការម៉ឺងម៉ាត់» ដើម្បីកាត់បន្ថយចំនួនលំនៅឋានដែលមិនទាន់សង់រួច និងផ្តល់លំហបន្ថែមទៀតសម្រាប់ «ការកែតម្រូវផ្អែកលើទីផ្សារ» នៅក្នុងវិស័យអចលនទ្រព្យ ដែលជាវិស័យដ៏សំខាន់កំពុងជាប់បំណុលវ័ណ្ឌក។
អ្នកស្រីបានបន្ថែមថា អាជ្ញាធរគួរតែជំរុញឱ្យពលរដ្ឋបង្កើនការចាយវាយតាមរយៈការពង្រឹងប្រព័ន្ធសោធននិវត្តន៍របស់ប្រទេសចិន និងចាត់វិធានការផ្សេងទៀតដើម្បីធ្វើឱ្យប្រព័ន្ធសន្តិសុខសង្គមដ៏ធំរបស់ខ្លួនមានភាពកាន់តែប្រសើរឡើង។
ជាងនេះទៀត អ្នកស្រី Georgieva បានជំរុញប្រទេសចិនឱ្យពង្រឹង «បរិយាកាសអាជីវកម្មនិង (ធានា) ការប្រកួតប្រជែងស្មើភាពរវាងសហគ្រាសឯកជននិងរដ្ឋ» ដែលនេះគឺជាការទាមទារជាយូរមកហើយរបស់ក្រុមអាជីវកម្មបរទេសដែលកំពុងធ្វើប្រតិបត្តិការនៅក្នុងប្រទេសចិន។
អ្នកនយោបាយកំពូលៗរបស់ចិនមានសុទិដ្ឋិនិយមលើសេដ្ឋកិច្ច ដោយនាយករដ្ឋមន្ត្រីចិនលោក Li Qiang បានបញ្ជាក់នៅក្នុងវេទិកាមួយកាលពីថ្ងៃទី ២៤ ខែមីនាថា រដ្ឋាភិបាលចិននឹង «ចាត់វិធានការដែលអាចប្រតិបត្តិជាក់ស្តែងនិងមានប្រសិទ្ធភាពដើម្បីលើកកម្ពស់ការអភិវឌ្ឍដែលមានគុណភាពខ្ពស់ និងបញ្ចូលថាមពលវិជ្ជមាន...ទៅក្នុងការរើបឡើងវិញនៃសេដ្ឋកិច្ចពិភពលោក»។
ប៉ុន្តែអត្រាកំណើនផលិតផលក្នុងស្រុកសរុប (GDP) នៅក្នុងប្រទេសចិនមានទំនោរធ្លាក់ចុះអស់រយៈពេលជាច្រើនឆ្នាំ ហើយរដ្ឋាភិបាលចិនកាលពីខែមីនាបានកំណត់គោលដៅអត្រាកំណើន GDP ប្រចាំឆ្នាំ «ប្រហែល ៥%» ដែលមានចំនួនទាបខ្លាំងជាងអត្រាពង្រីកសេដ្ឋកិច្ចដ៏ប្រថុយខ្លាំងដែលធ្លាប់ជួយឱ្យប្រទេសចិនមានភាពរុងរឿងយ៉ាងឆាប់រហ័សកាលពីមុន។
វេទិកាកាលពីថ្ងៃទី ២៤ ខែមីនានោះមានការចូលរួមពីឥស្សរជនអាជីវកម្មល្បីឈ្មោះនានានៅលើពិភពលោក ដូចជានាយកប្រតិបត្តិក្រុមហ៊ុន Apple លោក Tim Cook ជាដើម ដែលបានថ្លែងថា លោករីករាយពេញចិត្តនឹងការប្រជុំ «ដ៏ប្រសើរអស្ចារ្យ» ជាមួយនឹងលោក Li Qiang។
លោក Cook បានប្រាប់អ្នកកាសែតរបស់បណ្ដាញទូរទស្សន៍ CGTN របស់រដ្ឋាភិបាលចិនថា «ខ្ញុំគិតថា ប្រទេសចិនពិតជាបើកចំហ ហើយខ្ញុំសប្បាយចិត្តណាស់ដែលបានមកទីនេះ»។ នេះបើយោងតាមវីដេអូដែលបង្ហោះលើទំព័របណ្តាញសង្គមអនឡាញមួយរបស់បណ្ដាញទូរទស្សន៍ CGTN។
នៅក្នុងការលើកឡើងដាច់ដោយឡែកមួយដែលត្រូវបានបោះពុម្ពផ្សាយអនឡាញដោយទូរទស្សន៍ CCTV របស់ចិន លោក Cook បាននិយាយថា ក្រុមហ៊ុន Apple នឹងបន្តបង្កើនការវិនិយោគរបស់ខ្លួនលើការស្រាវជ្រាវនិងការអភិវឌ្ឍនៅក្នុងប្រទេសចិន។
លោកបានបន្ថែមថា កាសស្តាប់លំដាប់កំពូលរបស់ក្រុមហ៊ុន Apple ដែលមានឈ្មោះថា Vision Pro នឹងដាក់លក់នៅក្នុងប្រទេសចិននៅចុងឆ្នាំនេះ។ នេះបើយោងតាមសារបង្ហោះមួយនៅលើបណ្តាញសង្គមអនឡាញ។
លោក Cook បានធ្វើទស្សនកិច្ចនៅក្នុងទីក្រុងសៀងហៃដើម្បីសម្ពោធហាង Apple ថ្មីកាលពីពេលថ្មីៗនេះ ហើយកាលពីថ្ងៃទី ២២ ខែមីនា លោកបានពិភាក្សាជាមួយរដ្ឋមន្ត្រីពាណិជ្ជកម្មចិនលោក Wang Wentao អំពីផែនការពង្រីកក្រុមហ៊ុន Apple នៅក្នុងប្រទេសចិន៕
វេទិកាបញ្ចេញមតិ