ទីភ្នាក់ងារអវកាសឥណ្ឌាបានថ្លែងថា ប្រទេសឥណ្ឌាធ្វើតេស្តបង្ហោះយានអវកាសជាបន្តបន្ទាប់ជាលើកដំបូងដោយជោគជ័យកាលពីថ្ងៃសៅរ៍ ទី២១ ខែតុលា បន្ទាប់ពីបានជម្នះបញ្ហាបច្ចេកទេស មុនពេលធ្វើបេសកកម្មដែលបានគ្រោងទុកដើម្បីនាំអវកាសយានិកទៅកាន់ទីអវកាសនៅឆ្នាំ២០២៥។
ប្រធានអង្គការស្រាវជ្រាវអវកាសឥណ្ឌា លោក Shri Somanath បានថ្លែងថា ការធ្វើតេស្តនេះពាក់ព័ន្ធនឹងការបាញ់បង្ហោះយានផ្តាច់ខ្លួនមួយទៅកាន់លំហអវកាល និងនាំយាននោះមកផែនដីវិញ ដើម្បីធ្វើតេស្តប្រព័ន្ធដកគេចខ្លួនរបស់ក្រុមការងារនៅលើយានអវកាស។ យាននេះត្រូវបានយកបានមកវិញបន្ទាប់ពីធ្លាក់ចូលឆកសមុទ្រ Bengal។
ការបាញ់បង្ហោះត្រូវបានពន្យារពេល ៤៥នាទី នៅពេលព្រឹក ដោយសារលក្ខខណ្ឌអាកាសធាតុ។ លោក Somanath បានថ្លែងថា ការប៉ុនប៉ងនេះក៏ត្រូវបានពន្យារពេលម្តងទៀតជាងមួយម៉ោង ដោយសារតែមានបញ្ហាជាមួយម៉ាស៊ីន ហើយកុំព្យូទ័រលើដីបានផ្អាកការហោះឡើងរបស់យាននេះ។
លោក Somanath បានប្រាប់អ្នកសារព័ត៌មានថា ភាពមិនប្រក្រតីនៃការតាមដាននៅក្នុងប្រព័ន្ធត្រូវបានកែតម្រូវ ហើយការធ្វើតេស្តនេះត្រូវបានធ្វើឡើងដោយជោគជ័យ ៧៥ នាទីក្រោយមកពីស្ថានីយ៍បាញ់បង្ហោះផ្កាយរណប Sriharikota នៅភាគខាងត្បូងប្រទេសឥណ្ឌា។
ការធ្វើតេស្តនេះនឹងត្រួសត្រាយផ្លូវសម្រាប់បេសកកម្មគ្មានមនុស្សផ្សេងទៀត រួមទាំងការបញ្ជូនមនុស្សយន្តទៅកាន់ទីអវកាសនៅឆ្នាំក្រោយ។
កាលពីខែកញ្ញា ប្រទេសឥណ្ឌាបានចាប់ផ្តើមបេសកកម្មអវកាសដំបូងរបស់ខ្លួនដោយជោគជ័យដើម្បីសិក្សាពីព្រះអាទិត្យ ក្នុងរយៈពេលតិចជាងពីរសប្តាហ៍បន្ទាប់ពីការចុះចតដោយជោគជ័យនៅជិតតំបន់ប៉ូលខាងត្បូងនៃព្រះច័ន្ទ។
បន្ទាប់ពីការប៉ុនប៉ងបរាជ័យក្នុងការចុះចតនៅលើឋានព្រះច័ន្ទក្នុងឆ្នាំ២០១៩ ឥណ្ឌាក្នុងខែកញ្ញាបានក្លាយជាប្រទេសទី៤ ដែលសម្រេចបាននូវព្រឹត្តិការណ៍ដ៏សំខាន់នេះ បន្ទាប់ពីសហរដ្ឋអាមេរិក សហភាពសូវៀត និងចិន។
បេសកកម្មដ៏ជោគជ័យនេះបានបង្ហាញពីសមត្ថភាពដែលកំពុងកើនឡើងរបស់ប្រទេសឥណ្ឌាក្នុងនាមជាមហាអំណាចបច្ចេកវិទ្យា និងអវកាសមួយ។ ហើយវាក៏បង្ហាញពីបំណងប្រាថ្នារបស់លោកនាយករដ្ឋមន្ត្រី Narendra Modi ក្នុងការដាក់បង្ហាញឥណ្ឌាជាប្រទេសរីកចម្រើន និងជាមហាអំណាចពិភពលោកមួយ។
ជាការបង្ហាញពីផែនការសម្រាប់មហិច្ឆតាអវកាសនាពេលអនាគតរបស់ឥណ្ឌា លោក Modi កាលពីដើមសប្តាហ៍នេះ បានប្រកាសថា ទីភ្នាក់ងារអវកាសឥណ្ឌានឹងបង្កើតស្ថានីយអវកាសដែលផលិតដោយឥណ្ឌានៅឆ្នាំ២០៣៥ និងនាំយកអវកាសយានិកឥណ្ឌាទៅលើឋានព្រះច័ន្ទនៅឆ្នាំ ២០៤០។
ដោយមានភាពសកម្មតាំងពីទសវត្សរ៍ ១៩៦០ ឥណ្ឌាបានបាញ់បង្ហោះផ្កាយរណបសម្រាប់ខ្លួនឯង និងសម្រាប់ប្រទេសដទៃផ្សេងទៀត និងបានដាក់ផ្កាយរណបមួយនៅក្នុងគន្លងជុំវិញភពអង្គារបានដោយជោគជ័យក្នុងឆ្នាំ២០១៤។ ឥណ្ឌាកំពុងរៀបចំផែនការបេសកកម្មលើកដំបូងរបស់ខ្លួនទៅកាន់ស្ថានីយអវកាសអន្តរជាតិនៅឆ្នាំក្រោយដោយសហការជាមួយសហរដ្ឋអាមេរិក៕
