លោកនាយករដ្ឋមន្រ្តីអ៊ីស្រាអែល Benjamin Netanyahu និយាយថា កងទ័ពប្រទេសរបស់លោកនឹងកម្ទេចបណ្តាញរូងក្រោមដីឆ្លងកាត់ព្រំដែនដោយមានឬគ្មានបទឈប់បាញ់គ្នា។
លោក Netanyahu បានមានប្រសាសន៍ក្នុងអំឡុងពេលនៃជំនួបគណៈរដ្ឋមន្រ្តីរបស់លោកនៅថ្ងៃព្រហស្បតិ៍នេះថា លោកនឹងមិនសុខចិត្តទទួលយកកិច្ចព្រមព្រៀងណាមួយដែលនឹងរារាំងអ៊ីស្រាអែលមិនឲ្យបញ្ចប់អ្វីដែលខ្លួនបាននិយាយថា ជាការផ្តោតយកចិត្តទុកដាក់យ៉ាងសំខាន់នៅក្នុងកិច្ចប្រតិបត្តិការរបស់ខ្លួននៅក្នុងតំបន់ Gaza Strip។ មន្រ្តីការពារប្រទេសម្នាក់បាននិយាយកាលពីថ្ងៃពុធថា កងទ័ពអ៊ីស្រាអែលជិតបានសម្រេចនៅក្នុងការកម្ទេចរូងដីទាំងអស់ដែលត្រូវបានប្រើប្រាស់ដោយក្រុមហាម៉ាស។
ពួកយោធាក៏បានប្រកាសដែរថា ខ្លួនកំពុងកោះហៅទាហានបម្រុងចំនួន១៦.០០០នាក់ នៅពេលដែលជម្លោះបន្តចូលថ្ងៃទី២៤ដោយមានការវាយប្រហារតាមអាកាសនិងការបាញ់ផ្តក់ពីរថក្រោះកាន់តែខ្លាំងឡើង។ អ៊ីស្រាអែលបានចាប់ផ្តើមការវាយប្រហារកាលពីថ្ងៃទី៨ ខែកក្កដា នៅក្នុងការឆ្លើយតបដល់ការវាយប្រហារដោយគ្រាប់រ៉ុកកែតចេញពីតំបន់ Gaza Strip។ ចាប់តាំងពីពេលនោះមក ជម្លោះនោះ បានសម្លាប់មនុស្សជាង១.៣០០នាក់នៅក្នុងដែនដីប៉ាឡេស្ទីនហើយនឹងទាហានអ៊ីស្រាអែល៥៦នាក់។
អ៊ីស្រាអែលបានបញ្ជូនបេសកជនទៅកាន់ប្រទេសអេហ្ស៊ីបដើម្បីពិភាក្សាពីលទ្ធភាពនៃការឈប់បាញ់គ្នា។ រហូតមកទល់ពេលនេះ កិច្ចខំប្រឹងប្រែងអន្តរជាតិដើម្បីបញ្ឈប់ការប្រយុទ្ធគ្នា មិនបានទទួលជោគជ័យទេ រួមមានផែនការពីដំបូងរបស់អេហ្ស៊ីបដែលគេមិនដែលបានអនុវត្ត។
នៅពេលដែលអំពើហិង្សា បន្តរហូតមកដល់ថ្ងៃព្រហស្បតិ៍នេះ អង្គការសហប្រជាជាតិ បានរាយការណ៍ពីជនជាតិប៉ាឡេស្ទីនប្រហែល១៥.០០០ពាន់នាក់ កំពុងស្វះស្វែងរកជ្រកពួននៅក្នុងជម្រករបស់អង្គការសហប្រជាជាតិក្នុងតំបន់ Gaza។ កាលពីយប់ថ្ងៃពុធក្រសួងការពារប្រទេសសហរដ្ឋអាមេរិក បានប្រាប់ឲ្យដឹងថា ខ្លួនបានយល់ព្រមលក់គ្រាប់រំសេវទៅឲ្យអ៊ីស្រាអែល។ អ្នកនាំពាក្យមន្ទីរបញ្ចកោណ និយាយថា ការលក់នេះជាផ្នែកមួយនៃការតាំងចិត្តរបស់សហរដ្ឋអាមេរិកដល់សន្តិសុខរបស់អ៊ីស្រាអែល។
កាលពីប៉ុន្មានម៉ោងមុននោះ សេតវិមានបានថ្កោលទោស ការបាញ់ផ្តក់ដាក់សាលារៀនមួយកន្លែងដែលរៀបចំចាត់ចែងដោយអង្គការសហប្រជាជាតិដែលបានសម្លាប់មនុស្សយ៉ាងហោចណាស់ក៏១៥នាក់ហើយនឹងធ្វើឲ្យមនុស្សជាង១០០នាក់រងរបួស។
សេតវិមានមិនបានស្តីបន្ទោសភាគីណាមួយចំពោះការបាញ់ផ្តក់កាលពីថ្ងៃពុធទេ។ ក៏ប៉ុន្តែមន្រ្តីអង្គការសហប្រជាជាតិនិយាយថា អ៊ីស្រាអែលជាអ្នកទទួលខុសត្រូវ៕
