កងកម្លាំងដឹកនាំដោយពួក Kurde នៅក្នុងប្រទេសស៊ីរីបានវាយយកបានក្រុងមួយដែលធ្លាប់កាន់កាប់ដោយក្រុមរដ្ឋអ៊ីស្លាម នៅពេលពួកគេវាយយកបានដែនដីថែមទៀតនៅក្នុងការវាយលុកទៅមុខរបស់ពួកគេទៅកាន់សំបុកក្រុមរដ្ឋអ៊ីស្លាមនៅក្នុងប្រទេស។
ក្រុមយុទ្ធជន Kurde គាំទ្រដោយការវាយប្រហារតាមអាកាសដោយក្រុមចម្រុះដឹកនាំដោយស.រ.អា. និងពួកឧទ្ទាមខ្លះនិយាយថា ពួកគេបានវាយយកបានក្រុង Ain Issa កាលពីថ្ងៃអង្គារតែប៉ុន្មានម៉ោងក្រោយពីពួក Kurde បានវាយយកបានមូលដ្ឋានយោធាសំខាន់មួយពីពួកជនសកម្មប្រយុទ្ធរដ្ឋអ៊ីស្លាម នៅក្នុងប៉ែកខាងជើងនៃប្រទេសស៊ីរី។
អង្គការ Syrian Observatory for Human Rughs បានរាយការណ៍ថាពួកយុទ្ធជនរដ្ឋអ៊ីស្លាមបានដកថយទាំងស្រុងចេញពីក្រុង Ain Issa ហើយ។
លោក Redur Xelil អ្នកនាំពាក្យកងកម្លាំង Kurde បាននិយាយប្រាប់វីអូអេថា «នៅថ្ងៃអង្គារ ក្រុមយុទ្ធជន YPG និងកងកម្លាំង Euphrates Volcano បានរំដោះក្រុងយុទ្ធសាស្ត្រ Ain Issa ឋិតនៅចន្លោះ Hasaka និង Aleppo នៅលើផ្លូវអន្តរជាតិដែលភ្ជាប់ផ្នែកទាំងពីរនៃប្រទេសស៊ីរី។ យើងក៏បានរំដោះភូមិរាប់សិបនៅជុំវិញក្រុងនេះផងដែរ»។
ក្រសួងការពារប្រទេសស.រ.អា.មិនបានបញ្ជាក់ថាពិតនៅឡើយទេចំពោះរឿងដែលថាក្រុង Ain Issa និងមូលដ្ឋានយោធា Brigade 93 បានត្រូវវាយយកបានដោយកងកម្លាំង Kurde៕
