អនីតិជនដែលជាទណ្ឌិតនៅក្នុងពន្ធនាគារកម្ពុជាមានចំនួនគួរឲ្យកត់សម្គាល់។ យ៉ាងណាមិញ អង្គការមួយបានខិតខំបង្កើត និងផ្តល់ឱកាសទទួលបានការអប់រំ និងជំនាញដល់អនីតិជនមួយចំនួននៅខេត្តសៀមរាប និងខេត្តបន្ទាយមានជ័យ។
ចាប់តាំងពីឆ្នាំ២០០៧មក អង្គការជីវិតនៅកម្ពុជា (This Life Cambodia) បានធ្វើការងារតាមសហគមន៍ និងតាមពន្ធនាគារមួយចំនួននៅខេត្តសៀមរាប និងខេត្តបន្ទាយមានជ័យ ដើម្បីធ្វើឲ្យមានការផ្លាស់ប្តូរលើស្ថានភាពរបស់កុមារ ដែលជាអនីតិជនចំនួន១០៣នាក់ដោយផ្ទាល់ និងចំនួនជាង២០០០នាក់ដោយប្រយោល។
លោក ឈិន សែ នាយករងនៃអង្គការជីវិតនៅកម្ពុជា បានប្រាប់ VOA ថា ការងាររបស់អង្គការលោក គឺធ្វើយ៉ាងណាដើម្បីជួយពង្រឹងស្ថានភាពរបស់សហគមន៍នៅតាមតំបន់ជនបទ ជាពិសេសគឺអនីតិជនដែលមានអាយុក្រោម១៨ឆ្នាំដែលជាប់ពន្ធនាគារ និងក្រុមគ្រួសាររបស់ពួកគេ។
«កម្មវិធីដែលយើងកំពុងអនុវត្តនាពេលកន្លងមក និងនាពេលបច្ចុប្បន្ននេះគឺផ្តោតសំខាន់ទៅលើវិស័យអប់រំ ទៅលើការការពារយុត្តិធម៌របស់អនីតិជន ទៅលើអំពើហិង្សាមកលើស្ត្រី និងកុមារ ក៏ដូចជាការងារពាក់ព័ន្ធទៅនឹងការសិក្សាស្រាវជ្រាវ ហើយនឹងតាមដាន និងវាយតម្លៃ»។
អង្គការជីវិតនៅកម្ពុជា បានបង្កើតគម្រោងមួយចំនួន ដូចជាគម្រោងចេញពីរបាំងជីវិត ដើម្បីជួយធ្វើឲ្យស្ថានភាពរបស់អនីតិជនមានភាពប្រសើរឡើង ជាពិសេសគឺបង្កើត និងផ្តល់ឱកាសទទួលបានការអប់រំ និងជំនាញទាំងពេលពួកគេនៅក្នុងពន្ធនាគារ និងក្រោយពេលដែលពួកគេចេញពីពន្ធនាគារ។
លោក ឈិន សែ បានបញ្ជាក់ថា គម្រោងនោះបានអនុវត្តសកម្មភាពជាច្រើន ដូចជាផ្តល់វគ្គបណ្តុះបណ្តាលវិជ្ជាជីវៈ ការឧបត្ថម្ភគាំទ្រដល់គ្រួសាររបស់អនីតិជន និងការអភិវឌ្ឍសហគមន៍ដោយពង្រឹងសមត្ថភាពក្នុងការកសាងជីវភាពរស់នៅប្រចាំថ្ងៃរបស់ប្រជាពលរដ្ឋតាមសហគមន៍។
កាលពីពេលថ្មីៗនេះ មូលនិធិ Stars Foundationបានប្រគល់ពាន់រង្វាន់ Stars Impact Award ឆ្នាំ២០១៥ ដល់អង្គការក្រៅរដ្ឋាភិបាលពីររបស់កម្ពុជា គឺអង្គការសកម្មភាពដើម្បីកុមារ និងដល់អង្គការជីវិតនៅកម្ពុជា ដោយផ្តល់ជូនជាទឹកប្រាក់៥០,០០០ដុល្លារដល់អង្គការទាំងពីរនេះឲ្យបន្តការងារដ៏សំខាន់របស់ខ្លួនក្នុងការជួយគាំពារកុមារដែលងាយនឹងរងគ្រោះថ្នាក់នៅកម្ពុជា។
លោក ឈិន សែ បានបញ្ជាក់ថា ពានរង្វាន់នេះគឺដើម្បីទទួលស្គាល់ស្នាដៃរបស់អង្គការក្រៅរដ្ឋាភិបាលដូចជាអង្គការរបស់លោក ក្នុងការផ្លាស់ប្តូរជីវិតរបស់កុមារ ជាពិសេសគឺកុមារនៅក្នុងប្រទេសកំពុងអភិវឌ្ឍដូចប្រទេសកម្ពុជា។
«អង្គការជីវិតនៅកម្ពុជា អ្វីដែលយើងធ្វើនោះគឺផ្តោតសំខាន់ទៅលើប្រាកដថា រាល់ការងាររបស់យើងគឺឆ្លើយតបទៅនឹងតម្រូវការរបស់សហគមន៍ ដែលគាត់កំពុងតែមានបញ្ហា។ ហើយពានរង្វាន់នេះមិនមែនជាពានរង្វាន់សម្រាប់តែអង្គការរបស់ខ្ញុំផ្ទាល់ទេ តែវាក៏ជាពានរង្វាន់សម្រាប់ទាំងអស់គ្នា។ ពានរង្វាន់សម្រាប់កុមារដែលយើងធ្វើការជាមួយ។ ពានរង្វាន់សម្រាប់គ្រួសារ និងសហគមន៍របស់គាត់។ ពានរង្វាន់សម្រាប់រាជរដ្ឋាភិបាលកម្ពុជាយើងដែរ ដែលលោកបានអនុញ្ញាត និងបើកផ្លូវឲ្យយើងធ្វើការជាមួយគាត់»។
គិតមកត្រឹមឆ្នាំ២០១៥នេះ ចំនួនទណ្ឌិតដែលជាប់នៅពន្ធនាគារទាំងអស់នៅកម្ពុជាបានឡើងដល់១៧,៥២២នាក់ ដែលបានកើនប្រមាណ១៨ភាគរយ បើធៀបនឹងឆ្នាំ២០១៤។ ហើយក្នុងនោះ អនីតិជនមានចំនួនលើសពី៥០០នាក់ ដែលស្មើនឹង៣ភាគរយនៃចំនួនទណ្ឌិតសរុប។
អ្វីដែលជាបញ្ហានោះគឺថា កម្ពុជាកំពុងប្រើប្រាស់ប្រព័ន្ធតុលាការសម្រាប់មនុស្សពេញវ័យ ដើម្បីកាត់ទោសកុមារដែលមានអាយុក្រោម១៨ឆ្នាំ ដែលពួកគេត្រូវទទួលទោសដូចគ្នានឹងមនុស្សពេញវ័យសម្រាប់ការប្រព្រឹត្តអំពើខុសច្បាប់ទាំងក្នុងកម្រិតស្រាល និងធ្ងន់ធ្ងររបស់ពួកគេ។ នេះបើយោងតាមការបកស្រាយរបស់លោក ឈិន សែ។
«មិនមានច្បាប់ដោយឡែកសម្រាប់ពួកគាត់។ ច្បាប់ដោយឡែកដែលខ្ញុំនិយាយនេះគឺជាច្បាប់ ឬប្រព័ន្ធយុត្តិធម៌សម្រាប់អនីតិជន ដែលប្រទេសកម្ពុជាយើងមិនទាន់មានច្បាប់នេះនៅឡើយទេ។ ហើយស្ថានភាពរបស់កុមារនៅពេលបច្ចុប្បន្ននេះគឺនៅត្រង់ថា ការទទួលបានការអប់រំនៅក្នុងពន្ធនាគារ ឬក៏មណ្ឌលកែប្រែគឺមិនទាន់មានគ្រប់គ្រាន់នៅឡើយទេ គឺដោយសារតែរដ្ឋរបស់យើងបច្ចុប្បន្នមិនមានធនធានគ្រប់គ្រាន់។ ម្លោះហើយតម្រូវឲ្យមានការគាំទ្រពីអង្គការសង្គម ដូចជាអង្គការពួកខ្ញុំអញ្ចឹង ដើម្បីផ្តល់ឱកាសទៅដល់កុមារទាំងនៅក្នុងពន្ធនាគារ ក៏ដូចជានៅពេលដែលគាត់ធ្វើសមាហរណកម្មមកខាងក្រៅ»។
លោក ឈិន សែ បានសង្ឃឹមថា ច្បាប់សម្រាប់យុត្តិធម៌របស់កុមារដែលកំពុងតែត្រូវបានតាក់តែងនោះ នឹងទទួលបានអាទិភាពពីរដ្ឋាភិបាល យកទៅអនុម័តដោយសភា និងអនុវត្តឲ្យបានឆាប់ៗ ដើម្បីធានាថា កុមារដែលប្រព្រឹត្តអំពើខុសច្បាប់ទទួលបានយុត្តិធម៌បែបអនីតិជន។
បន្ថែមលើនេះ លោក ឈិន សែ បានបញ្ជាក់ថា ការងាររបស់អង្គការរបស់លោកមិនអាចទទួលបានលទ្ធផលវិជ្ជមានបែបនេះទេ បើសិនជាគ្មានការសហការពីថ្នាក់ដឹកនាំរបស់មន្ទីរពន្ធនាគារ និងមជ្ឈមណ្ឌលកែប្រែនៅខេត្តសៀមរាប និងបន្ទាយមានជ័យនោះ។
«អញ្ចឹងយើងនឹងបន្តធ្វើការយ៉ាងជិតស្និទ្ធជាមួយនឹងក្រសួងដែលពាក់ព័ន្ធ ជាពិសេសគឺយើងសូមថ្លែងអំណរគុណដល់អគ្គនាយកដ្ឋានពន្ធនាគារ ក៏ដូចជាប្រធានពន្ធនាគារទាំងពីរខេត្ត ទាំងខេត្តសៀមរាប និងបន្ទាយមានជ័យ ដែលគាត់បានជ្រោមជ្រែងអង្គការយើងមែនទែន ហើយបានអនុញ្ញាតឲ្យយើងចូលទៅធ្វើការក្នុងពន្ធនាគារ ក៏ដូចជាជ្រោមជ្រែងយើងដោយផ្តល់ជាយោបល់កែប្រែធ្វើឲ្យមានការប្រសើរឡើងទាំងអស់គ្នា»។
យ៉ាងណាមិញ មានកិច្ចខិតខំប្រឹងប្រែងជាបន្តបន្ទាប់ទាំងពីខាងរដ្ឋាភិបាល និងអង្គការសង្គមជាច្រើន ដូចជាអង្គការជីវិតនៅកម្ពុជា ដើម្បីធានាថា អនីតិជនដែលចេញពីពន្ធនាគារទទួលបានឱកាសអប់រំ និងជំនាញដើម្បីធ្វើសមាហរណកម្មក្នុងសង្គមជាថ្មីម្តងទៀត៕
