ផ្កាថ្មនៅជុំវិញពិភពលោកកំពុងជួបប្រទះព្រឹត្តិការណ៍ស្លេកពណ៌ដ៏ធំជាលើកទី៤ ដោយប្រែទៅជាពណ៌សក្បុស។ នេះបើតាមការបញ្ជាក់ឱ្យដឹងរបស់ទីភ្នាក់ងារជាតិបរិយាកាសនិងមហាសមុទ្រអាមេរិក NOAA កាលពីថ្ងៃទី១៥ ខែមេសាកន្លងទៅ។ ការប្រែពណ៌នេះអាចធ្វើប៉ះពាល់ដល់សេដ្ឋកិច្ចពិភពលោក ប្រព័ន្ធអេកូឡូស៊ី និងជីវិតរស់នៅ។ នេះបើតាមរបាយការណ៍មួយរបស់ទីភ្នាក់ងារ NOAA។
ចាប់ពីខែកុម្ភៈឆ្នាំ២០២៣មក ផ្កាថ្មនៅក្នុងប្រទេសនិងដែនដីជាង៥៤ បានទទួលរងការប្រែពណ៌ជាខ្លាំង ហើយការប្រកាសពីការប្រែពណ៌ជាសាកលនាពេលថ្មីៗនេះ គឺជាលើកទី២ហើយ ក្នុងរយៈពេល១០ឆ្នាំកន្លងទៅនេះ។
ការប្រែពណ៌នេះជាការគំរាមកំហែងមួយដល់បណ្តុំផ្កាថ្ម ដោយសារវាកើតឡើងនៅពេលមានការប្រែប្រួលសីតុណ្ហភាព ដែលធ្វើឱ្យស្រទាប់ផ្កាថ្មទាំងនោះបញ្ចេញកោសិកាចិញ្ចឹមរបស់វាមកក្រៅ។ ក្នុងព្រឹត្តិការណ៍ប្រែពណ៌ដ៏ច្រើន ដូចជាលើកនេះនិង៣លើកមុនជាដើម កើតមានឡើងជួនពេលគ្នានឹងការកើតឡើងនូវបាតុភូត El Niño ឬការឡើងសីតុណ្ហភាពទឹកសមុទ្រ។
ខណៈដែលការប្រែពណ៌ផ្កាថ្មបានក្លាយជារឿងធម្មតាកាន់តែខ្លាំងថែមទៀតនោះ វាត្រូវបានគេចាត់ទុកថាជាការប្រែពណ៌ជាសាកល ប្រសិនបើវាកើតឡើងនៅក្នុងតំបន់អាងសមុទ្រដ៏សំខាន់មួយរបស់ភពផែនដី ដែលរួមមានមហាសមុទ្រអាត្លង់ទិក ប៉ាស៊ីហ្វិក និងមហាសមុទ្រឥណ្ឌា ក្នុងអំឡុងរយៈពេល៣៦៥ថ្ងៃ។
លោក Derek Manzello អ្នកសម្របសម្រួលនៃការឃ្លាំមើលផ្កាថ្មនៃទីភ្នាក់ងារ NOAA ដែលតាមដានត្រួតពិនិត្យពីកម្តៅបានបញ្ជាក់ថា៖ «ខណៈដែលមហាសមុទ្រពិភពលោកបន្តឡើងកម្តៅ ការប្រែពណ៌ផ្កាថ្មអាចកើតឡើងកាន់តែញឹកញាប់និងមានសភាពធ្ងន់ធ្ងរ»។
យោងតាមទីភ្នាក់ងារសារព័ត៌មាន Reuters ព្រឹត្តិការណ៍ផ្កាថ្មប្រែពណ៌ជាសាកលនេះជារឿងអាក្រក់មួយ។ លោក Lorenzo Alvarez-Filip អ្នកសិក្សាពីអេកូឡូស៊ីសមុទ្រនៃសាកលវិទ្យាល័យ National Autonomous ក្នុងប្រទេសម៉ិកស៊ិកនិយាយថា៖ «អ្វីដែលអ្នកមុជទឹកបានឃើញនោះគឺមានពណ៌សនៅកន្លែងថ្មប៉ប្រះទឹកមួយចំនួន»។
លោក Alvarez-Filip ថ្លែងបន្ថែមទៀតថា ប្រសិនបើទឹកត្រជាក់ វាអាចទៅរួចដែលផ្កាថ្មដែលប្រែពណ៌ទៅជាសទាំងនោះអាចត្រឡប់មកសភាពដូចដើមវិញ ប៉ុន្តែផ្កាថ្មក្នុងតំបន់ការ៉ាអ៊ីបខ្លះ បានឡើងដល់ចំណុចមួយ ដែលផ្កាថ្មទាំងនោះងាប់និងមិនអាចស្តារឡើងវិញ បើទោះជាទឹកចុះត្រជាក់ក្នុងរដូវរងាក៏ដោយ។
ទីភ្នាក់ងារ NOAA បាននិយាយនៅក្នុងសេចក្តីថ្លែងការណ៍មួយថា៖ «ព្រឹត្តិការណ៍ពិភពលោកមួយនេះតម្រូវឱ្យចាត់វិធានការជាសាកលដូចគ្នាដែរ»។ សេចក្តីថ្លែងការណ៍ដដែលនេះបន្ថែមទៀតថា ទីភ្នាក់ងារ NOAA រួមជាមួយភាគីពាក់ព័ន្ធអន្តរជាតិនានា កំពុងជួយអន្តរាគមន៍សង្គ្រោះនិងស្តារផ្កាថ្មឱ្យប្រសើរឡើងវិញក្នុងអំឡុងពេលនៃការប្រែប្រួលអាកាសធាតុនេះ៕
ព័ត៌មានមួយចំនួននៅក្នុងសេចក្តីរាយការណ៍នេះ ត្រូវបានស្រង់ចេញពីទីភ្នាក់ងារសារព័ត៌មាន Reuters ទីភ្នាក់ងារសារព័ត៌មាន The Associated Press និងទីភ្នាក់ងារសារព័ត៌មាន Agence France-Presse ។
ប្រែសម្រួលដោយលោក ជ្រា វណ្ណារិទ្ធ
វេទិកាបញ្ចេញមតិ