ប្រទេសជប៉ុននិយាយថា លោកបារ៉ាក់ អូបាម៉ា ប្រធានាធិបតីស.រ.អាបានសម្តែងការសោកស្តាយទាក់ទងនឹងការចោទប្រកាន់ដែលថា ស.រ.អាស៊ើបការណ៍សម្ងាត់អំពីមន្ត្រីជប៉ុនជាន់ខ្ពស់។
សេចក្តីអត្ថាធិប្បាយរបស់លោកប្រធានាធិបតីធ្វើឡើងអំឡុងពេលនិយាយទូរស័ព្ទរវាងលោក និងលោក Shinzo Abe នាយករដ្ឋមន្ត្រីជប៉ុន នេះបើយោងតាមលោក Yoshihide Suga អ្នកនាំពាក្យរដ្ឋាភិបាលជប៉ុន។
លោក Suga និយាយថា លោកប្រធានាធិបតីអូបាម៉ានិយាយថា លោកសោកស្តាយណាស់ទាក់ទងនឹងរឿងដែលនាំឲ្យមានការដេញដោលគ្នានៅក្នុងប្រទេសជប៉ុននោះ។ តែទោះជាយ៉ាងណាក្តីលោក Suga មិនអាចបញ្ជាក់ឲ្យបានជាក់លាក់ថា តើលោកប្រធានាធិបតីអូបាម៉ានិយាយថា មានការស៊ើបការណ៍ ឬយ៉ាងណានោះទេ។
លោក Suga បន្ថែមថា លោកនាយករដ្ឋមន្ត្រីជប៉ុនបានបង្ហាញកង្វល់យ៉ាងជ្រាលជ្រៅអំពីរឿងនេះ ហើយបានកត់ស្គាល់ថា ការចោទប្រកាន់នេះអាចធ្វើឲ្យប៉ះពាល់ការទុកចិត្តគ្នារវាងសម្ព័ន្ធមិត្តទាំងពីរ។
មន្ត្រីសេតវិមានមិនទាន់បានធ្វើអត្ថាធិប្បាយអំពីការពិភាក្សាគ្នានោះទេ។ កាលពីខែមិនា បណ្តាញព័ត៌មាន WikiLeaks បានចេញសេចក្តីអត្ថាធិប្បាយមួយដែលបណ្តាញនេះនិយាយថា វាបង្ហាញអំពីការស៊ើបការណ៍របស់ស.រ.អាលើក្រុមហ៊ុនជាង៣០ និងក្រសួងនានាក្នុងរដ្ឋាភិបាល ព្រមទាំងបុគ្គលមួយចំនួននៅប្រទេសជប៉ុន។
WikiLeaks និយាយថា ការស៊ើបការណ៍នេះទាក់ទងនឹងទំនាក់ទំនងរវាងស.រ.អា និងជប៉ុន ការចរចាពាណិជ្ជកម្ម យុទ្ធសាស្ត្រប្រឆាំងនឹងការប្រែប្រួលអាកាសធាតុ ហើយការស៊ើបការណ៍នេះធ្វើឡើងតាំងពីឆ្នាំ២០០៦ ពេលលោក Abe ធ្វើជានាយករដ្ឋមន្ត្រីអាណត្តិទីមួយ៕
