លោកប្រធានាធិបតីសហរដ្ឋអាមេរិកបារ៉ាក់ អូបាម៉ា បានថ្កោលទោសអ្វីដែលលោកបានហៅថា ជាការហួសចិត្តចំពោះការវាយប្រហារភេរវកម្មនៅឯសណ្ឋាគារមួយកន្លែងនៅក្នុងរដ្ឋធានីនៃប្រទេសម៉ាលី ដែលបានសម្លាប់មនុស្ស ២៥នាក់ហើយលោកប្រធានាធិបតីបានសន្យាតាមប្រមាញ់ពួកឃាតករទាំងនោះ។
ថ្លែងនៅឯសន្និសីទកំពូលរបស់ពួកមេដឹកនាំក្នុងតំបន់នៅក្នុងរដ្ឋធានីនៃប្រទេសម៉ាឡេស៊ី លោកប្រធានាធិបតីអូបាម៉ាបានមានប្រសាសន៍កាលពីថ្ងៃសុក្រថា ការវាយប្រហារនៅក្នុងទីក្រុង Bamako នឹងពង្រឹងសហរដ្ឋអាមេរិកដើម្បីប្រយុទ្ធប្រឆាំងភេរវកម្ម។
លោកប្រធានាធិបតីអូបាម៉ាបានមានប្រសាសន៍នៅក្នុងទីក្រុង Kuala Lumpurខណៈដែលកំពុងចូលរួមសន្និសីទកំពូលប្រចាំឆ្នាំរបស់សមាគមប្រជាជាតិអាស៊ីអាគ្នេយ៍ថា «ដូចជា ការវាយប្រហារដ៏ព្រៃផ្សៃដែលយើង បានឃើញនៅក្នុងទីក្រុងប៉ារីស ហើយនឹងការវាយប្រហារដែលយើងបានឃើញជាញឹកញាប់នៅកន្លែងផ្សេងទៀត ការណ៍វាយប្រហារនេះបានដាស់តឿនថា មានការគំរាមកំហែងភេរវកម្មច្រើននៅក្នុងប្រទេសរបស់យើង»។
លោកប្រធានាធិបតី អូបាម៉ាមានប្រសាសន៍ទៀតថា សហរដ្ឋអាមេរិក សម្ព័ន្ធមិត្ត និងដៃគូនានាបានតាំងចិត្តការពារពលរដ្ឋរបស់ខ្លួន បដិសេធចោលមនោគមវិជ្ជាស្អប់ខ្ពើមដែលអុជអាលឲ្យមានភេរវកម្ម ហើយកម្ទេចបណ្តាញភេរវកម្ម។
ក្រុមជនសកម្មប្រយុទ្ធតំបន់អាហ្វ្រិកខាងលិច២គឺ ក្រុម al-Qaida នៅក្នុងក្រុម Islamic Maghreb (AQIM)ហើយនឹងក្រុម El Mourabitoune បានអះអាងទទួលខុសត្រូវរួមគ្នាដល់ការវាយប្រហារនេះ។ មន្រ្តីក្រសួងការពារប្រទេសសហរដ្ឋអាមេរិកបានហៅក្រុម (AQIM) ថាជាក្រុមសង្ស័យដ៏សំខាន់មួយនៅក្នុងការវាយប្រហារនោះ៕
