ក្រុមអាជ្ញាធរថៃបានចេញដីកាចាប់ខ្លួន និងចុះផ្សាយគំនូរព្រាងរបស់បុរសម្នាក់ដែលពួកគេជឿថា អាចជាអ្នកទទួលខុសត្រូវចំពោះការបំផ្ទុះគ្រាប់បែក ដែលបានសម្លាប់មនុស្សយ៉ាងហោចណាស់ក៏២២នាក់ដែរនៅឯទីកន្លែងសក្ការបូជានៅក្រុងបាងកក។
លោក Somyot Poompanmoung ប្រធានប៉ូលិសបាននិយាយនៅថ្ងៃពុធនេះថា ជនសង្ស័យជាអ្នកដាក់គ្រាប់បែកទំនងធ្វើឡើងជាផ្នែកមួយនៃបណ្តាញ ក៏ប៉ុន្តែមិនទាន់បានបញ្ជាក់ពីគោលបំណង ឬសញ្ជាតិរបស់ជននោះទេ។
លោក Somyot បាននិយាយនៅថ្ងៃពុធនេះពីរថ្ងៃ បន្ទាប់ពីការផ្ទុះគ្រាប់បែកនៅឯទីទីសក្ការបូជា Erawan ដ៏មានប្រជាប្រិយភាពមួយ ដែលបានធ្វើឲ្យរង្គើរាជធានីថា «ជាការពិត ជននោះមិនបានធ្វើតែម្នាក់ឯងទេ។ គេប្រាកដជាមានបណ្តាញ»។
គំនូរព្រាងដែលបានចេញផ្សាយដោយក្រុមអាជ្ញាធរ បានបង្ហាញពីបុរសក្មេងម្នាក់មានសក់ពណ៌ខ្មៅរួញ មានពុកចង្កាខ្លី ហើយពាក់វ៉ែនតា។ ក្រុមមន្រ្តីនិយាយថា ជននោះ អាចជាជនជាតិថៃឬជនជនជាតិបរទេស ដោយមានសក់សំពីងសំពោងពណ៌ខ្មៅហើយពាក់យឺតពណ៌លឿងបានទុកសាក់កាដូនៅក្រោមកៅអីវែង ហើយបានដើរចេញដោយស្ងប់ស្ងាត់ពីកន្លែងកើតហេតុ មុនពេលផ្ទុះគ្រាប់បែកនោះ។
លោកនាយករដ្ឋមន្រ្តីបានប្រាប់ពួកអ្នកយកព័ត៌មាននៅថ្ងៃពុធនេះថា «ខ្ញុំចង់ប្រាប់អ្នកដាក់គ្រាប់បែកថា ប្រសិនបើអ្នកចង់មានសុវត្ថិភាព អ្នកត្រូវតែប្រគល់ខ្លួន ហើយក្រុមមន្រ្តីនឹងស្វែងរកមធ្យោបាយដើម្បីការពារអ្នក»។
អ្នកនាំពាក្យប៉ូលិសបាននិយាយក្រោយមកថា បុរស២នាក់ផ្សេងទៀត ដែលម្នាក់បានត្រូវគេឃើញពាក់អាវពណ៌ក្រហម ហើយម្នាក់ទៀតពាក់អាវពណ៌សនៅក្នុងកាសែតវីដេអូ CCTV ក៏ជាជនសង្ស័យនៅក្នុងការវាយប្រហារនោះដែរ៕
