មេដឹកនាំបណ្តាប្រទេសអាស៊ីអាគ្នេយ៍ ឬអាស៊ាន ដែលដឹកនាំដោយម្ចាស់ផ្ទះគឺប្រធានាធិបតីឥណ្ឌូណេស៊ីលោក Joko Widodo កំពុងជួបប្រជុំគ្នានៅមុនជំនួបកំពូលចុងក្រោយប្រចាំឆ្នាំរបស់ខ្លួន ដោយមានបញ្ហាខ្វែងគំនិតគ្នាជាច្រើន ដែលមិនទាន់មានដំណោះស្រាយ រួមមានបញ្ហាជម្លោះស៊ីវិលដ៏ប្រល័យក្នុងប្រទេសមីយ៉ាន់ម៉ា ភាពតានតឹងថ្មីៗដែលទើបកើតមានក្នុងសមុទ្រចិនខាងត្បូង និងការប្រជែងដ៏យូរមកហើយរវាងសហរដ្ឋអាមេរិកនិងប្រទេសចិនជាដើម។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
កិច្ចប្រជុំរបស់អាស៊ាន នឹងត្រូវបើកធ្វើនៅថ្ងៃអង្គារស្អែកនេះ នៅក្នុងរដ្ឋធានីហ្សាការតា នៃប្រទេសឥណ្ឌូណេស៊ី នៅក្រោមសន្តិសុខដ៏តឹងរ៉ឹង។ អវត្តមានរបស់ប្រធានាធិបតីសហរដ្ឋអាមេរិកលោក Joe Biden ដែលជាទូទៅចូលរួមក្នុងកិច្ចប្រជុំនេះ បានបន្ថែមឱ្យមានស្រមោលកាន់តែស្រអាប់បន្ថែមទៀត ទៅលើទិដ្ឋភាពដែលស្រអាប់រួចទៅហើយ ក្នុងការបង្ហាញនូវការឯកភាពនិងការចាប់ដៃគ្នាជាប្រពៃណីនៃបណ្តាក្រុមប្រទេសទាំង ១០ របស់ប្លុកមួយនេះ។
ក្រុមរដ្ឋមន្ត្រីការបរទេសអាស៊ាន បានជួបប្រជុំគ្នានៅថ្ងៃចន្ទនេះ មុនជំនួបកំពូលមេដឹកនាំរបស់ពួកគេ។ លោក Mohammad Mahfud រដ្ឋមន្ត្រីសម្របសម្រួលកិច្ចការនយោបាយ ច្បាប់និងសន្តិសុខឥណ្ឌូណេស៊ី បានប្រាប់ក្រុមអ្នកការទូតក្នុងតំបន់ថា «កម្លាំងរបស់សហគមន៍មួយនេះ កំពុងរងការប្រឈមពីវិបត្តិមួយដល់វិបត្តិមួយទៀត»។
រដ្ឋមន្ត្រីឥណ្ឌូណេស៊ីរូបនេះបានលើកបញ្ជាក់ថា កង្វះការចម្រើនទៅមុខនៃកិច្ចប្រឹងប្រែង ដើម្បីរកដំណោះស្រាយនៃវិបត្តិក្នុងប្រទេសមីយ៉ាន់ម៉ា បាន«ទុកនូវស្លាកស្នាមអវិជ្ជមានមួយដល់ប្លុកអាស៊ាន»។ លោកក៏បានព្រមានផងដែរថា ការកើនឡើងនូវភាពតានតឹងខាងភូមិសាស្ត្រនយោបាយនិងការប្រជែងគ្នា «អាចនាំទៅដល់ការបើកចំហនៃជម្លោះដែលតំបន់របស់យើងនឹងត្រូវបង្ខំដើម្បីប្រឈម»។
រដ្ឋមន្ត្រីការបរទេសឥណ្ឌូណេស៊ី អ្នកស្រី Retno Marsudi និយាយថា ផែនការ ៥ ចំណុច ដែលត្រូវបានធ្វើឡើងកាលពីឆ្នាំ ២០២១ ដោយមេដឹកនាំអាស៊ាន ដើម្បីជួយប្រទេសមីយ៉ាន់ម៉ាវិលទៅរកសភាពធម្មតាវិញនោះ នឹងត្រូវត្រួតពិនិត្យឡើងវិញ។
ក្រោយការពិភាក្សាគ្នានៅថ្ងៃអង្គារស្អែកនេះ ប្រមុខរដ្ឋអាស៊ាននឹងជួបជាមួយដៃគូអាស៊ីនិងបស្ចិមប្រទេស ពីថ្ងៃពុធដល់ថ្ងៃព្រហស្បតិ៍ ដោយផ្តល់វេទិកាទូលំទូលាយជាងមុន ដែលសហរដ្ឋអាមេរិកនិងប្រទេសចិន និងសម្ព័ន្ធមិត្តរបស់គេ នឹងប្រើប្រាស់ដើម្បីពិភាក្សាគ្នាទៅលើបញ្ហាពាណិជ្ជកម្មសេរី ការប្រែប្រួលអាកាសធាតុ និងសន្តិសុខសាកលជាដើម។ វានឹងក្លាយជាសមរភូមិមួយសម្រាប់ការប្រជែងតវ៉ារបស់ពួកគេ។
នាយករដ្ឋមន្ត្រីចិនលោក Li Qiang ត្រៀមកំណត់នឹងចូលរួមក្នុងកិច្ចប្រជុំទាំងនោះ ដែលរួមមានកិច្ចប្រជុំកំពូលអាស៊ីបូព៌ា ដែលមាន ១៨ ប្រទេសជាសមាជិក។ នាយករដ្ឋមន្ត្រីចិនរូបនេះ ក៏នឹងជួបជាមួយអនុប្រធានាធិបតីសហរដ្ឋអាមេរិក លោកស្រី Kamala Harris ដែលនឹងចូលរួមនៅក្នុងកិច្ចប្រជុំកំពូលនេះជំនួសលោក Biden និងជួបជាមួយរដ្ឋមន្ត្រីការបរទេសរុស្ស៊ីលោក Sergey Lavrov ផងដែរ។
ខណៈមិនចូលរួមក្នុងជំនួបកំពូលអាស៊ាន ប្រធានាធិបតីអាមេរិក លោក Joe Biden នឹងធ្វើដំណើរទៅទ្វីបអាស៊ី ដើម្បីទៅចូលរួមក្នុងកិច្ចប្រជុំកំពូលក្រុមប្រទេសដែលមានសេដ្ឋកិច្ចជឿនលឿនទាំង ២០ ឬ G20 ក្នុងប្រទេសឥណ្ឌា។ ហើយបន្ទាប់មក លោកនឹងធ្វើដំណើរទស្សនកិច្ចក្នុងប្រទេសវៀតណាម ដើម្បីបង្កើនទំនាក់ទំនងរវាងប្រទេសទាំងពីរ។ រដ្ឋាភិបាលក្រុងវ៉ាស៊ីនតោននិយាយថា លោក Biden មិនបានផ្តល់តម្លៃទាបដល់តំបន់អាស៊ានសម្រាប់អាទិភាពភូមិសាស្ត្រនយោបាយនោះឡើយ និងបានលើកឡើងពីកិច្ចប្រឹងប្រែងរបស់ប្រធានាធិបតីសហរដ្ឋអាមេរិករូបនេះ ដើម្បីចូលរួមកាន់តែខ្លាំងថែមទៀត ជាមួយតំបន់អាស៊ាន៕
