កាលពីថ្ងៃពុធ ទី១០ ខែមេសា មេដឹកនាំក្រុមតាលីបង់បានបដិសេធការសម្របសម្រួលណាមួយអំពីអភិបាលកិច្ចបែបអ៊ិស្លាមតឹងតែងរបស់លោក នៅអាហ្វហ្កានីស្ថាន ទោះជាមានការរិះគន់សាកលនិងការអំពាវនាវឱ្យលោកបញ្ឈប់ការរឹតត្បិតលើស្ត្រីក៏ដោយ។
លោក Hibatullah Akundzada បានថ្លែងសុន្ទរកថានិងដឹកនាំអ្នកគោរពសាសនាអ៊ិស្លាមរាប់ពាន់នាក់នៅក្នុងការសូត្រធម៌ក្នុងពិធី Eid al-Fitr នៅឯវិហារអ៊ិស្លាម mosque កណ្តាលក្នុងក្រុង Kandahar នាប៉ែកខាងត្បូងប្រទេស ដើម្បីប្រារព្ធការបញ្ចប់ការបង្អត់អាហារក្នុងខែរ៉ាម៉ាដន (Ramadan) នៃសាសនាអ៊ិស្លាម។
លោក Akhundzada បាននិយាយនៅក្នុងសុន្ទរកថារបស់លោកជាភាសា Pashto ផ្សាយតាមស្ថានីយវិទ្យុរដ្ឋនៃប្រទេសអាហ្វហ្កានីស្ថានថា៖ «ប្រសិនបើនរណាមានបញ្ហាជាមួយយើង យើងបើកចំហដើម្បីដោះស្រាយបញ្ហាទាំងនេះ តែយើងនឹងមិនសម្របសម្រួលដោយបោះបង់ចោលគោលការណ៍យើងឬសាសនាអ៊ិស្លាមជាដាច់ខាត។ នៅពេលជាមួយគ្នានេះ យើងរំពឹងថា សាសនាអ៊ិស្លាមនឹងមិនត្រូវមិនគោរពនោះទេ។ ខ្ញុំនឹងមិនចាត់វិធានការណាមួយចាកចេញពីច្បាប់អ៊ិស្លាមឡើយ»។
លោក Akundzada បានឆ្លើយតបនឹងការរិះគន់ឥតឈប់ដោយអង្គការសហប្រជាជាតិនិងបណ្តាប្រទេសលោកខាងលិចដល់ការបកស្រាយតឹងរ៉ឹងរបស់ពួកតាលីបង់អំពីសាសនាអ៊ិស្លាមដែលរដ្ឋាភិបាលបានប្រើដើម្បីគ្រប់គ្រងប្រទេសអាហ្វហ្កានីស្ថានដ៏ក្រីក្រ រួមមានការវាយដោយរំពាត់ជាសាធារណៈនិងការគប់ដុំថ្មលើស្ត្រីមានសហាយ។
លោក Akhundzada បានថ្លែងថា៖ «ខ្ញុំអនុវត្តការដាក់ទណ្ឌកម្មតាមច្បាប់អ៊ិស្លាម។ ពួកគេជំទាស់នឹងការអនុវត្តនេះ ដោយនិយាយថាការគប់ដុំថ្មជាសាធារណៈនិងការកាត់ដៃប្រឆាំងនឹងច្បាប់និងសិទ្ធិមនុស្សរបស់ពួកគេ។ លោកអ្នករំពឹងឱ្យយើងធ្វើតាមធ្វើតាមច្បាប់លោកអ្នកនៅពេលដាក់កំហិតវាលើយើង។ សាសនាអ៊ិស្លាមជាសាសនាមួយរបស់ព្រះអាទិទេពដែលសក្ដិសមទទួលការគោរព តែលោកអ្នកប្រមាថមើលងាយសាសនានេះទៅវិញ»។
បើតាមសាសនាអ៊ិស្លាម Hudud ជាច្បាប់និងការដាក់ទណ្ឌកម្មចែងដោយព្រះអាទិទេពក្នុងគម្ពីរ Quran ដែលជាគម្ពីរពិសិដ្ឋនៃសាសនាអ៊ិស្លាម។
លោក Akhundzada បានពោលថាពួកប្រទេសដែលចូលរួមក្នុងការលុកលុយអាហ្វហ្កានីស្ថានដឹកនាំដោយសហរដ្ឋអាមេរិកនៅតែវាយប្រហារប្រទេសលោកដោយ«ការឃោសនា»និង«កលយុទ្ធអាក្រក់ដូចបីសាច»ដើម្បីនិយាយបង្កាច់បង្ខូចការគ្រប់គ្រងរបស់ពួកតាលីបង់។
លោកថា៖ «ពួកគេបន្ទោសពួកមេដឹកនាំអ្នក ដោយអះអាងថាមេដឹកនាំទាំងនេះគ្មានសមត្ថភាពគ្រប់គ្រងប្រទេស។ ចូរកុំបណ្តោយឱ្យពួកប្រឆាំងនឹងអ៊ិស្លាមទាំងនេះនាំឱ្យអ្នកភ័ន្តច្រឡំ។ អ្នកត្រូវតែប្រុងប្រយ័ត្ននិងដឹងអំពីកលល្បិចបំភាន់របស់ពួកជនទាំងនេះ។ គោលដៅរបស់ពួកគេគឺធ្វើឱ្យយើងបរាជ័យ»។
មេដឹកនាំតាលីបង់រូបនេះបានផ្អាកការសិក្សារបស់កុមារីនៅអហ្វាហ្គានីស្ថានលើសពីថ្នាក់ទី៦និងហាមប្រាមស្ត្រីច្រើននាក់មិនឱ្យធ្វើការផ្នែកសាធារណៈនិងផ្នែកឯកជន រួមមានអ.ស.ប.និងអង្គការផ្តល់ជំនួយឯទៀតៗ។ ស្ត្រីក៏ត្រូវហាមប្រាមមិនឱ្យទៅកាន់កន្លែងសាធារណៈដូចជាឱទ្យាន កន្លែងហាត់ប្រាណនិងកន្លែងងូតទឹកជាដើម។
លោក Akhundzada បានការពារក្រិត្យរបស់គាត់ដោយនិយាយថាវាត្រឹមត្រូវតាមវប្បធម៌អាហ្វហ្កានីស្ថាននិងសាសនាអ៊ិស្លាម។
ពួកតាលីបង់បានវិលត្រឡប់ទៅកាន់អំណាចវិញកាលពីខែសីហា ឆ្នាំ ២០២១ នៅពេលរដ្ឋាភិបាលអាហ្វហ្កានីស្ថាននៅពេលនោះដែលគាំទ្រដោយអន្តរជាតិបានរលំ ហើយពួកប្រទេសលោកខាងលិចដឹកនាំដោយសហរដ្ឋអាមេរិកបានដកទាហានពួកគេទាំងអស់នៅក្រោយមានការទាក់ទិនជិត ២០ឆ្នាំ ក្នុងសង្គ្រាមជាមួយក្រុមតាលីបង់ដែលពេលនោះជាក្រុមបះបោរ។
តាំងពីពេលនោះមក អាជ្ញាធរពិតប្រាកដនៃប្រទេសអាហ្វហ្កានីស្ថានបានវាយបុរសនិងស្ត្រីដោយរំពាត់ជាសាធារណៈក្នុងកីឡដ្ឋានមានមនុស្សមើលរាប់ពាន់នាក់។ ជនរងគ្រោះទាំងនេះត្រូវបានកាត់ទោសដោយបានប្រព្រឹត្តបទល្មើសផ្សេងៗដូចជាការលួច ការប្លន់ សហាយស្មន់និង«ឧក្រិដ្ឋកម្មខាងសីលធម៌»ឯទៀតៗដោយតុលាការពួកតាលីបង់។
មានរូបថតតែមួយគត់របស់លោក Akhundzada ដែលពួកតាលីបង់បានប្រើជាផ្លូវការតាំងពីលោកធ្វើជាមេបញ្ជាការនៃក្រុមបះបោរ កាលពីឆ្នាំ ២០១៦។
ក្រុមអ្នកតំណាងបណ្តាញព័ត៌មានមិនត្រូវបានអនុញ្ញាតឱ្យចូលរួមក្នុងការប្រជុំជាសាធារណៈរបស់លោកទេ ហើយពួកអ្នកដើរតាមលោកក៏ត្រូវបានហាមប្រាមដាច់ណាត់មិនឱ្យថតរូបលោកតាមទូរសព្ទដៃរបស់ពួកគេឡើយ។
មេដឹកនាំតាលីបង់រូបនេះមិនសូវចាកចេញពីក្រុង Kandahar ទេ ហើយលោកគ្រប់គ្រងប្រទេសពីទីនោះ។
សហគមន៍អន្តរជាតិមិនបានទទួលស្គាល់ជាផ្លូវការរដ្ឋាភិបាលតាលីបង់ដែលមានតែបុរសទេ ដោយនិយាយយោងដល់កង្វល់ខាងសិទ្ធិមនុស្ស ជាពិសេសការប្រព្រឹត្តតឹងតែងលើស្ត្រីអាហ្វហ្កានីស្ថាន។ ប្រទេសជាច្រើនដែលមានប្រជារាស្ត្រភាគច្រើនជាអ្នកគោរពសាសនាអ៊ិស្លាមក៏បានប្រឆាំងដែរនឹងការរឹតត្បិតរបស់ពួកតាលីបង់លើស្ត្រី ដោយនិយាយថាវាមិនមែនផ្អែកលើគោលការណ៍អ៊ិស្លាមទេ៕
ប្រែសម្រួលដោយលោក ឈឹម សុមេធ
