ប្រទេសថៃនិងកម្ពុជា បានព្រមព្រៀងគ្នាជំរុញចំណងទាក់ទងខាងសេដ្ឋកិច្ចនិងពាណិជ្ជកម្មក្នុងអំឡុងពេលនៃដំណើរបំពេញទស្សនៈកិច្ចផ្លូវការមួយរបស់នាយករដ្ឋមន្ត្រី ហ៊ុន សែន ទៅកាន់ប្រទេសថៃ។
ដំណើរទស្សនៈកិច្ចនេះ បង្ហាញ នូវភាពចុះសម្រុងដ៏សំខាន់មួយនៅក្នុងទំនាក់ទំនងទ្វេភាគី ដែលមានភាពតានតឹងកាលពីប៉ុន្មានឆ្នាំថ្មីៗនេះ។
ដំណើរបំពេញទស្សនៈកិច្ចដោយនាយករដ្ឋមន្ត្រី ហ៊ុន សែន គឺជាលើកទីមួយនៅក្នុងរយៈពេល១២ឆ្នាំនេះ។
ថ្លែងបន្ទាប់ពីការចុះហត្ថលេខាលើកិច្ចព្រមព្រៀងជាច្រើនដើម្បីធ្វើឲ្យប្រសើរឡើងនូវពាណិជ្ជកម្ម និងបញ្ហាសន្តិសុខ លោក ប្រាយុទ្ធ ច័ន្ធអូចា (Prayuth Chan o-cha) នាយករដ្ឋមន្ត្រីថៃ បាននិយាយថា ប្រទេសទាំង២ មានគោលបំណងពង្រឹងទំនាក់ទំនងទ្វេភាគី។
« ទំនាក់ទំនងរវាងថៃនិងកម្ពុជា នៅពេលបច្ចុប្បន្ននេះ ល្អបំផុត»។
កាលពីដំបូង លោកនាយករដ្ឋមន្ត្រី ហ៊ុន សែន បានអំពាវនាវនៅឯវេទិកាពាណិជ្ជកម្មថៃនិងកម្ពុជា ឲ្យមានវិនិយោគទុនថៃកាន់តែច្រើនឡើងនៅកម្ពុជា។
ប្រទេសទាំង២ បានសន្យាបង្កើនពាណិជ្ជកម្មនិងការវិនិយោគទុនទ្វេភាគីដល់ទៅ៣ដងនៅឆ្នាំ២០២០។លោកស្រី ផាវីដា ប៉ាណានុនដ៏ (Pavida Pananond) សេដ្ឋវិទូម្នាក់នៃសាកលវិទ្យាល័យ ធម្មសាត (Thammasat )និយាយថា កិច្ចព្រមព្រៀងកិច្ចស្ដីពីសហប្រតិបត្តិការខាងពលកម្មនិងការងារ ដែលប្រទេសទាំង២ បានចុះហត្ថលេខាផ្ដោតលើតួនាទីដ៏មានសារៈសំខាន់របស់កម្មករចំណាកស្រុកកម្ពុជានៅក្នុងសេដ្ឋកិច្ចថៃ។
«កម្ពុជា ក៏ជាប្រភពពលកម្មសំខាន់ទី២នៅក្នុងសេដ្ឋកិច្ចថៃដែរ។ដូច្នេះ ខ្ញុំ គិតថា ផលប្រយោជន៍សេដ្ឋកិច្ចដ៏សំខាន់រវាងប្រទេសទាំង២ ប្រហែលបានបន្ធូរបន្ថយទំនាក់ទំនងអរិភាព ដែលប្រទេសទាំង២ មានរយៈពេលប៉ុន្មានឆ្នាំមុននោះ»។
ភាពតានតឹងរវាងកម្ពុជានិងថៃ រីកកាន់តែធំឡើងក្នុងមួយទសវត្សរ៍កន្លងមកនេះនៅក្នុងជម្លោះអំពីការកំណត់ព្រំដែនប្រាសាទបុរាណតាមបែបហិណ្ឌូដែលកសាងក្នុងសតវត្សរ៍ទី១៩ ដែលគេហៅថា ប្រាសាទព្រះវិហារ នៅក្នុងប្រទេសកម្ពុជាឬព្រះវិហាននៅក្នុងប្រទេសថៃ ។
ជម្លោះព្រំដែន បានផ្ទុះឡើងរវាងកងទ័ពនៃប្រទេសទាំង២ ពីឆ្នាំ២០០៨រហូតដល់ឆ្នាំ២០១១ នៅពេលដែលជម្លោះនោះ ត្រូវបានដោះស្រាយដោយតុលាការយុត្តិធម៌អន្តរជាតិ។
លោកនាយករដ្ឋមន្ត្រី មានចំណងទាក់ទងដ៏ជិតស្និទ្ធជាមួយលោក ថាក់ស៊ីន ស៊ីណាវាត្រា (Thaksin Shinawatra) អតីតនាយករដ្ឋមន្រ្តីថៃ ដែលបានត្រូវបណ្ដេញចេញពីអំណាចនៅក្នុងរដ្ឋប្រហារយោធានៅឆ្នាំ២០០៦ ហើយទំនាក់ទំនងដ៏ជិតស្និទ្ធនោះ បានបន្តរហូតដល់រដ្ឋាភិបាលបន្ទាប់ ដែលដឹកនាំដោយលោកស្រី យីងឡាក់ ស៊ីណាវ៉ាត្រា ( Yingluck Shinawatra) ដែលជាប្អូនស្រីរបស់លោក ថាក់ស៊ីន។ រដ្ឋបាលរបស់លោកស្រី ត្រូវបានទម្លាក់ដោយលោកឧត្ដមសេនីយ៍ ប្រាយុទ្ធ ច័ន្ទអូចា កាលពីឆ្នាំទៅ។
សេដ្ឋវិទូ ផាវីដា (Pavida) និយាយបន្តទៀតថា ឥឡូវនេះ ប្រទេសទាំង២ ហាក់ដូចជាមើលឃើញចំណងទាក់ទងទ្វេភាគីកាន់តែជាក់លាក់ឡើង។
«ចេញពីទស្សនៈរបស់កម្ពុជា ថៃ ជាមហាអំណាចសេដ្ឋកិច្ចដ៏សំខាន់នៅក្នុងតំបន់ ហើយសេដ្ឋកិច្ចកម្ពុជា ពឹងផ្អែកយ៉ាងខ្លាំងលើសេដ្ឋកិច្ចរបស់ប្រទេសថៃ។ ខ្ញុំ គិតថា ចេញពីទស្សនៈកម្ពុជា ការណ៍នេះ ជាផលប្រយោជន៍សេដ្ឋកិច្ចនៅពេលអនាគតរបស់ពួកគេ ហើយក៏ជាការអភិវឌ្ឍន៍សេដ្ឋកិច្ចក្នុងតំបន់ដែរ»។
លោកស្រី បានមានប្រសាសន៍បន្តទៀតថា រដ្ឋាភិបាលយោធាថៃ ក៏កំពុងព្យាយាមធ្វើឲ្យមានចំណងទាក់ទងប្រសើរឡើងនៅក្នុងតំបន់ នៅពេលដែលសេដ្ឋកិច្ច មិនសូវរីកចម្រើនហើយនឹងមានកម្សោយនៃការនាំចេញទំនិញផងនោះ៕
ប្រែសម្រួលដោយ ជឹង ប៉ូជីន
