មន្រ្តីយោធាកំពូលម្នាក់របស់សហរដ្ឋអាមេរិក កំពុងស្ថិតក្នុងប្រទេសវៀតណាមដើម្បីធ្វើការចរចាជាប្រវត្តិសាស្ត្រជាមួយរដ្ឋាភិបាលវៀតណាម ដែលជាផ្នែកមួយនៃកិច្ចខំប្រឹងប្រែងថ្មីៗបំផុតដើម្បីពង្រីកចំណងទាក់ទងរវាងកងទ័ពអតីតគូសត្រូវទាំងពីរនេះ។
លោកឧត្តមសេនីយ៍ Martin Dempsey នាយកអគ្គសេនាធិការកងទ័ពសហរដ្ឋអាមេរិក ជួបនៅថ្ងៃព្រហស្បតិ៍នេះជាមួយនាយករដ្ឋមន្រ្តី Nguyen Tan Dung និងរដ្ឋមន្រ្តីការពារប្រទេសវៀតណាម Phung Quang Thanh នៅក្នុងទីក្រុងហាណូយ។
មុនពេលជំនួបសម្ងាត់ លោកឧត្តមសេនីយ៍ Dempsey បានប្រាប់ក្រុមអ្នកយកព័ត៌មានថា ដំណើរបំពេញទស្សនកិច្ចនេះគឺផ្ដោតលើវិជ្ជាជីវៈរបស់លោក។ វាជាលើកទីមួយហើយ ចាប់តាំងពីឆ្នាំ១៩៧១មក ដែលអគ្គសេនាធិការកងទ័ពសហរដ្ឋអាមេរិកបានបំពេញទស្សនកិច្ចប្រទេសវៀតណាមនោះ។
ក្រសួងការពារប្រទេសវៀតណាមប្រាប់ឲ្យដឹងថា ការចរចានេះនឹងផ្តោតលើការពង្រឹងកិច្ចសហប្រតិបត្តិការយោធា ដោយផ្តោតលើសន្តិសុខផ្លូវនាវាចរណ៍ ការរុករកនិងការជួយសង្គ្រោះ និងការបំបាត់កេរដំណែលសង្គ្រាម។
ការបង្កើនកិច្ចសហប្រតិបត្តិការលើវិស័យការពារប្រទេស កើតមានឡើងនៅពេលដែលរដ្ឋាភិបាលទីក្រុងហាណូយ មានការពាក់ព័ន្ធក្នុងជម្លោះដ៏ជូរចត់ជាមួយចិននៅសមុទ្រចិនខាងត្បូង៕
