ក្រុមបេក្ខជនជាប់ឆ្នោតសមាជិកសភាគណបក្សជំទាស់ពីរនាក់បន្ថែមទៀតអះ អាងថា ពួកគេត្រៀមខ្លួនបំភ្លឺតុលាការទាក់ទងនឹងអំពើហិង្សានៅសួនប្រជាធិបតេយ្យ។
យ៉ាងតិចមានបេក្ខជនជាប់ឆ្នោតតំណាងរាស្ត្រពីររូបផ្សេងទៀតរបស់គណបក្ស សង្គ្រោះជាតិគឺលោកឡុង រី និងលោក នុត រំដួល អាចប្រឈមមុខនឹងការកោះហៅទៅបំភ្លឺនៅតុលាការ ឬប្រឈមមុខនឹងការចាប់ឃុំខ្លួន ដូចគ្នានឹងសហសេវិក៦នាក់ដែលសង្ស័យថា មានជាប់ទាក់ទងនឹងអំពើហិង្សាដ៏ធំចុងក្រោយនៅសួនប្រជាធិបតេយ្យនោះ។ នេះបើតាមការអះអាងរបស់មន្ត្រីនិងជនចាប់ចោទ។
ជនជាប់ចោទទាំងពីរបានអះអាងដូចគ្នាថា ពួកអស់លោកនឹងមិនខ្លាចការចូលទៅបំភ្លឺនៅក្នុងតុលាការទេ ទោះជាមានការចាប់ខ្លួនក្តី។
លោកឡុង រី បេក្ខជនជាប់ឆ្នោតតំណាងរាស្ត្រនៅមណ្ឌលបន្ទាយមានជ័យ បាន ថ្លែងប្រាប់វីអូអេផ្នែកខេមរភាសាថា លោកទើបបានដឹងដំណឹងនេះ ហើយក៏ត្រៀមនឹងចូលរួមបំភ្លឺដែរនៅពេលតុលាការកោះហៅ។
«យើងត្រូវតែចូលហើយ ព្រោះវាអត់មានជម្រើស។ យើងអត់បានធ្វើអីខុសផង ស្រាប់តែទៅចោទយើងអញ្ចឹង។ ហើយបើយើងគេចទៅ ដូចជាយើងនាំកំហុសទៅជាមួយអញ្ចឹង។ យើងអត់បានធ្វើអីឲ្យមានកំហុសទេ»។
លោក នុត រំដួល បេក្ខជនជាប់ឆ្នោតតំណាងរាស្ត្រនៅមណ្ឌលកំពង់ស្ពឺ បាន អះអាងថា លោកទើបបានទទួលដំណឹងនេះដែរ ហើយក៏មិនគេចចេញពីការកោះហៅរបស់តុលាការដែរ។
«ខ្ញុំនឹងអញ្ជើញទៅតាមការកោះហៅរបស់តុលាការ ព្រោះខ្ញុំអត់មានកំហុសអីទាល់តែសោះ អត់មានរឿងអីត្រូវការកោតញញើតនិងខ្លាចមិនហ៊ានចូល។ អត់ទេ ព្រោះអត់មានកំហុសអីត្រូវប៉ះពាល់ផងបាទ»។
ទាំងលោកនុត រំដួល និងលោកឡុង រីបានបញ្ជាក់ថា ពួកអស់លោកបានចូលរួមក្នុងបាតុកម្ម ដោយអហិង្សាដើម្បីសុំឲ្យបើកទីលានប្រជាធិបតេយ្យកាលពីថ្ងៃ អង្គារនោះដែរ ប៉ុន្តែពួកអស់លោកបានអះអាងថា មិនបានចូលរួមក្នុងអំពើហិង្សានេះទេ។ លោកសំ សុគង់ មេធាវីការពារក្តីក្រុមមន្ត្រីគណបក្សសង្គ្រោះជាតិដែលត្រូវឃុំខ្លួននោះ ក៏បានបញ្ជាក់បន្ថែមអំពីបញ្ហាដីកាចោទប្រកាន់បន្ថែមលើក្រុមបេក្ខជនជាប់ឆ្នោតតំណាងរាស្ត្រពីរនាក់គឺលោកឡុង រី និងលោកនុត រំដួលដែរ។
«នៅក្នុងដីកាសន្និដ្ឋានបញ្ជូនឲ្យស៊ើបសួរ ការចោទប្រកាន់ហ្នឹងគឺចោទរួម ជាមួយអ្នក៦នាក់ដែលគេចាប់ខ្លួន និងគេឃុំខ្លួនហ្នឹង ហើយនៅក្នុងហ្នឹង គាត់ពីរនាក់ហ្នឹងក៏ត្រូវបានគេចោទប្រកាន់ដែរ»។
ទោះជាយ៉ាងណាក៏ដោយ នៅក្នុងដីកាចោទប្រកាន់ចេញដោយលោកកែវ សុជាតិ ព្រះរាជអាជ្ញារងអមតុលាការក្រុងភ្នំពេញ ដែលគេបានអាននោះគឺនៅមានមនុស្សមួយចំនួនបន្ថែមទៀតអាចត្រូវចាប់ខ្លួនដែរ ដែលក្រុមអ្នកវិភាគនិងមន្ត្រីគណបក្សជំទាស់អះអាងថា ការចាប់ខ្លួននេះអាចជាឧបសគ្គដល់ការចរចាគ្នារវាងគណបក្សទាំងពីរគឺគណបក្សប្រជាជនកម្ពុជា និងគណបក្សសង្គ្រោះជាតិ ដើម្បីបញ្ចប់ជម្លោះនយោបាយ។
លោកកឹម សុខា ប្រធានស្តីទីនៃគណបក្សសង្គ្រោះជាតិ បានព្រមានថា ទោះជា ការចាប់ឃុំខ្លួនបេក្ខជនជាប់ឆ្នោតតំណាងរាស្ត្រទាំង៥រូប និងមន្ត្រីគណបក្ស មួយរូប និងមានការតាមរកចាប់ខ្លួនបន្ថែមទៀតក្តី តែទង្វើនេះមិនអាចកែប្រែជំហរគណបក្សរបស់លោកទាក់ទងនឹងការចរចាដោះស្រាយនយោបាយទេ។
«យើងបានប្រជុំបេក្ខជនតំណាងរាស្ត្រជាប់ឆ្នោតរបស់យើងថ្ងៃមិញនេះ ហើយ យើងសម្រេចទាំងអស់គ្នាថា យើងដាច់ខាតអត់ឲ្យគេយកសម្ពាធហ្នឹងមកដោះដូរ នឹងអ្វីដែលជាផលប្រយោជន៍នៃលទ្ធិប្រជាធិបតេយ្យ ផលប្រយោជន៍ជាតិ ដែល យើងកំពុងតែតវ៉ាទាមទារទេ។ យើងនៅរក្សាគោលជំហរយើងដដែល អត់មាន ឲ្យយកមកដោះដូរទេ រួមទាំងបេក្ខជនជាប់ឆ្នោតតំណាងរាស្ត្រ ដែលត្រូវគេចាប់ ឃុំក្នុងគុក។ គាត់ផ្តាំផ្ញើរមកយើងដែរគឺថា អត់ដាច់ខាត គឺយើងអត់មានដោះដូរ ទេ»។
បេក្ខជនជាប់ឆ្នោតតំណាងរាស្ត្រ៥រូប ដែលត្រូវចាប់ខ្លួនកាលពីថ្ងៃអង្គារនោះ មាន លោកស្រីមួរ សុខហួរ លោកហូរ វ៉ាន់ លោករៀល ខេមរិន្រ្ទ លោកកែវ ភារម្យ និង លោកម៉ែន សុថាវរិន្រ្ទ។ ចំណែកលោក អឿ ណារិទ្ធ ជំនួយការអ្នកស្រីមួរ សុខហួរ ម្នាក់ទៀតត្រូវបានសមត្ថកិច្ចចាប់ខ្លួននៅព្រឹកថ្ងៃពុធនេះ។
ក្រុមមន្ត្រីទាំងនេះត្រូវចាប់ឃុំខ្លួនពីបទផ្តើមគំនិតនិងញុះញង់ឲ្យមានបាតុកម្ម ហិង្សានៅទីលានប្រជាធិបតេយ្យកាលពីថ្ងៃអង្គារក្នុងរាជធានីភ្នំពេញដែលមានមនុស្សជាង៥០នាក់ ទាំងសន្តិសុខ និងបាតុកររងរបួស។
ការចាប់ខ្លួននេះកើតឡើងដំណាលគ្នា ដែលគណបក្សទាំងពីរខកខានក្នុងការរកដំណោះស្រាយនយោបាយ ក្រោយការបោះឆ្នោតកាលពីខែកក្កដាឆ្នាំ២០១៣។
គណបក្សជំទាស់គឺគណបក្សសង្គ្រោះជាតិរបស់លោកសម រង្ស៉ី និងលោកកឹម សុខាបន្តពហិកាប្រជុំសភា ដោយចោទប្រកាន់ថា ការបោះឆ្នោតមានការគៃបន្លំធ្ងន់ធ្ងរ ហើយស្នើសុំឲ្យមានការយល់ព្រមកែទម្រង់ការបោះឆ្នោត ស្ថាប័នបោះឆ្នោត និងជ្រើសរើសសមាជិកគណៈកម្មការជាតិរៀបចំការបោះឆ្នោត(គ.ជ.ប.)ដោយការអនុម័តនូវសំឡេង២ភាគ៣នៃសមាជិកសភាសរុប១២៣រូប។ រូបមន្តនេះអាចផ្តល់ផលប្រយោជន៍ដល់គណបក្សជំទាស់ ដែលមានសំឡេងតិច។ តែគណបក្សប្រជាជនកម្ពុជារបស់លោកនាយករដ្ឋមន្ត្រីហ៊ុន សែន បដិសេធដោយចង់កម្រិតត្រឹមតែសំឡេង៥០ភាគបូក១សម្រេចអនុម័តសមាសភាពគ.ជ.ប. ដែលគណបក្សប្រជាជនកម្ពុជាមានលើសពីចំនួននោះជាស្រេច។
លោកជាម យៀប ជាមន្ត្រីជាន់ខ្ពស់គណបក្សប្រជាជនកម្ពុជា និងជាប្រធានគណៈអចិន្ត្រៃយ៍ហិរញ្ញវត្ថុនៃរដ្ឋសភា បានថ្លែងថា ការចាប់ខ្លួនបេក្ខជនជាប់ឆ្នោត តំណាងរាស្ត្រជារឿងអនុវត្តន៍ច្បាប់ មិនទាក់ទងនឹងការចរចាគ្នាទេ។
«ខ្ញុំគ្រាន់តែសុំជម្រាបថា មិនមែនជាការកៀបសង្កត់ទេ ចូលឬមិនចូល ស៊ីសង ទៅលើឆន្ទៈគណបក្សសង្គ្រោះជាតិទេ។ គណបក្សប្រជាជនកម្ពុជាចេះតែបន្តនិរន្តរភាពរបស់រដ្ឋតទៅទៀតហើយ ក្នុងអង្គការនីតិបញ្ញតិ និងអង្គការនីតិប្រតិបត្តិ»។
គណបក្សទាំងពីរបានចោទប្រកាន់គ្នាទៅវិញទៅមកជាមួយនឹងការចេញសេចក្តីថ្លែងការណ៍តាមក្រសួងនានា និងសន្និសីទកាសែតដើម្បីការពារខ្លួន និងបំភ្លឺ ពលរដ្ឋឲ្យបានដឹងអំពីស្ថានការណ៍ ដែលកើតឡើងទាក់ទងនឹងអំពើហិង្សា ដ៏ធំដែលកើតមានកាលពីថ្ងៃអង្គារ ដែលគេដឹងថា កើតឡើងជាលើកទី២ក្នុងរយៈ ពេលជាង៦ខែនេះ។
តែក្រុមមេដឹកនាំគណបក្សសង្គ្រោះជាតិបានជួបជាមួយនឹងមន្ត្រីការទូតមួយ ចំនួន ដូចជាស.រ.អា. ជប៉ុន និងអឺរ៉ុប ដែលព្រួយបារម្ភខ្លាំងអំពីស្ថានការណ៍កម្ពុជា ក្រោយពីមានអំពើហិង្សានិងការចាប់ខ្លួនក្រុមជំទាស់នេះ។
លោកកឹម សុខាអះអាងថា៖ «មួយថ្ងៃពីរនេះ គឺយើងជួបទូតធំៗ ដូចជា អាមេរិក ដូចជាជប៉ុន ដូចជាសហភាពអឺរ៉ុប ក៏មានក្រុមប្រតិភូទូតនៃប្រទេសផ្សេងៗនៅអឺរ៉ុបផ្សេងទៀតដែរ»។
តែក្រុមមន្ត្រីគណបក្សកាន់អំណាចរបស់លោកនាយករដ្ឋមន្ត្រីហ៊ុន សែនវិញ បានកោះអញ្ជើញ អ្នកការទូតក្នុងប្រទេសជាច្រើនចូលរួមបកស្រាយបំភ្លឺអំពី ស្ថានការណ៍នេះដែរ។ មានក្រុមអ្នកការទូតខ្លះចង់ឲ្យមានការសម្របសម្រួលនិងដោះលែងក្រុមជំទាស់។
អ្នកវិភាគក្នុងប្រទេសគឺលោកសុខ ទូច សាកលវិទ្យាធិការនៃសាកលវិទ្យាល័យ ខេមរៈ បានអះអាងថា ការចាប់ឃុំខ្លួនជាបន្តបន្ទាប់នេះបង្ហាញថា គណបក្ស ទាំងពីរចង់ឈ្នះ ចាញ់គ្នា ដោយមិនចង់ចរចា ហើយនឹងអាចធ្វើឲ្យប្រវត្តិសាស្ត្រ នៃការគ្រប់គ្រងប្រទេសដោយអំពើហិង្សានោះកើតឡើងជាថ្មីនៅជំនាន់ក្រោយ ទៀត។ លោកបន្ថែមថា ការពាក់ព័ន្ធរបស់បរទេសនេះជាការបង្ហាញថា មានការពឹងផ្អែកលើបរទេសជាជាងការចរចារវាងខ្មែរនិងខ្មែរ៕
