កាលពីថ្ងៃសុក្រលោកប្រធានាធិបតីអ៊ុយក្រែន Petro Poroshenko បានមានប្រសាសន៍ថាមាន «ការថយចុះជាលំដាប់» នៅក្នុងការប្រយុទ្ធគ្នាជាមួយក្រុមទាមទារបំបែករដ្ឋគាំទ្រដោយប្រទេសរុស្សីនៅក្នុងភាគខាងកើតនៃប្រទេសអ៊ុយក្រែន។
លោក Poroshenko បាននិយាយប្រាប់ទូរទស្សន៍ 1+1 នៃប្រទេសអ៊ុយក្រែនថា «ការពិតគឺយើងគ្មានទាហានស្លាប់អស់រយៈពេលបីបួនថ្ងៃមុនមកហើយ...នេះជាការបញ្ជាក់ច្បាស់លាស់អំពីការថយចុះជាលំដាប់នៃការប្រយុទ្ធគ្នា» ។
ក៏ប៉ុន្តែលោកបាននិយាយថាប្រសិនបើមានការប្រយុទ្ធគ្នាម្តងទៀត ប្រទេសអ៊ុយក្រែននឹង «ទទួលអាវុធយុទ្ធភណ្ឌជាបន្ទាន់» ពីប្រទេសជាតិក្នុងសហភាពអឺរ៉ុប។ លោកមិនបាននិយាយទេថា ប្រទេសណាមួយដែលបានសន្យាថានឹងផ្តល់អាវុធនិងអំពីអាវុធប្រភេទណាពិតប្រាកដទេ។
កាលពីខែមុន លោករដ្ឋមន្ត្រីការពារប្រទេសជាតិបារាំង Jean-Yves Le Drian បាននិយាយថារដ្ឋាភិបាលទីក្រុងប៉ារីសគ្មានបំណងផ្តល់អាវុធធុនធ្ងន់ឲ្យរដ្ឋាភិបាលទីក្រុងកៀវ (Kyiv) «នៅពេលនេះទេ»។ លោកស្រីអធិការបតីអាល្លឺម៉ង់ Angela Merkel ក៏បានមានប្រសាសន៍ដែរថាលោកស្រីជំទាស់នឹងការបញ្ជូនអាវុធទៅឲ្យប្រទេសអ៊ុយក្រែន។
ប្រទេសអ៊ុយក្រែននិងក្រុមទាមទារបំបែករដ្ឋបានចុះហត្ថលេខាលើកិច្ចព្រមព្រៀងឈប់បាញ់គ្នាមួយកាលពីខែមុននៅក្នុងក្រុង Minsk ហើយបានសន្យាថានឹងដកអាវុធធុនធ្ងន់ផងដែរ។
ទោះបីជាមានការបាញ់ផ្លោងញឹកញាប់ ក៏ក្រុមអ្នកសង្កេតការណ៍បាននិយាយថា ការឈប់បាញ់គ្នានេះត្រូវបានធ្វើតាមជាទូទៅ៕
