គណៈកម្មាធិការឃ្លាំមើលរបស់អង្គការសហប្រជាជាតិមួយនិយាយថា ប្រទេសជាច្រើននៅទ្វីបអាហ្វ្រិកមិនបានគោរពកាតព្វកិច្ចរបស់ខ្លួន តាមអនុសញ្ញាស្តីពីសិទ្ធិកុមារឆ្នាំ១៩៩០នោះទេ។ គណៈកម្មាធិការនេះនិយាយថា ប្រពៃណីវប្បធម៌ប្រកបដោយគ្រោះថ្នាក់ និងរូបភាពផ្សេងៗទៀតនៃការរំលោភសិទ្ធិមនុស្សនៅតែបន្តកើតឡើងនៅទូទាំងទ្វីបអាហ្រ្វិក។
គណៈកម្មាធិការសិទ្ធិកុមាររបស់អ.ស.ប ដែលត្រួតពិនិត្យការអនុវត្តអនុសញ្ញាស្តីពីសិទ្ធិកុមារ នាពេលថ្មីៗនេះបានបញ្ចប់កិច្ចប្រជុំរយៈពេល៣សបា្តហ៍របស់ខ្លួននៅក្នុងទីក្រុងហ្សឺណែវ (Geneva)។ អ្នកជំនាញឯករាជ្យ១៨នាក់ បានពិនិត្យមើលកំណត់ត្រារបស់ប្រទេសចំនួន១៤ ដែលរួមមានប្រទេសនៅទ្វីបអាហ្រ្វិកចំនួន៥ មានដូចជា ប្រទេសបេណាំង (Benin) ប្រទេសកេនយ៉ា (Kenya) ប្រទេសសេណេហ្គាល់ (Senegal) ប្រទេសសំប៊ី (Zambia) និងប្រទេសស៊ីមបាវ៉េ (Zimbabwe)។
គណៈកម្មាធិការនេះបានរកឃើញពីការអនុវត្តដ៏គ្រោះថ្នាក់ ដូចជាការកាត់ប្រដាប់ភេទរបស់មនុស្សស្រី និងការរៀបការរបស់កុមារ នៅតែកំពុងត្រូវបានអនុវត្តនៅក្នុងប្រទេសទាំងនោះ។ ហើយក្នុងករណីមួយនៅប្រទេសកេនយ៉ា អ្នកជំនាញបានបង្ហាញក្តីបារម្ភអំពី «ការពាក់អង្កាំ» ទៅលើក្មេងស្រីៗ ដែលជាទម្រង់មួយនៃការយកធ្វើជាទាសករផ្លូវភេទនៅក្នុងគ្រួសារ ដែលជារឿយៗបណ្តាលឲ្យមានការចាប់រំលោភ។
អ្នកជំនាញឯករាជ្យបានថ្កោលទោសការសម្លាប់ និងការជួញដូរផ្នែកខ្លួនប្រាណរបស់ក្មេងៗភឿកនៅក្នុងប្រទេសកេនយ៉ា ដែលករណីមួយចំនួនត្រូវបានប្រព្រឹត្តឡើងដោយសមាជិកក្រុមគ្រួសាររបស់ពួកគេផ្ទាល់តែម្តង។ ប៉ុន្តែក្រុមអ្នកជំនាញកត់សម្គាល់ថា ការអនុវត្តឃោរឃៅបែបនេះកំពុងតែបន្តកើតមាននៅក្នុងប្រទេសនៅអាហ្រ្វិកចំនួន១៦។
លោក Benyam Mezmur ដែលជាប្រធានគណៈកម្មាធិការប្រាប់ VOA ថា មនុស្សភឿកនិយម ជារឿយៗត្រូវបានភ្ជាប់ទៅនឹងការបោះឆ្នោត ដោយសារតែវាត្រូវបានគេយល់ថា ផ្នែកនៃរាងកាយក្មេងៗដែលមានសភាពបែបនេះនឹងនាំមកនូវសំណាងល្អ។
«ឧទាហរណ៍ ក្នុងពេលបោះឆ្នោតនៅក្នុងប្រទេសកេនយ៉ា មានឧប្បត្តិហេតុជាច្រើន ដែលចំនួននៃការវាយប្រហារបានកើនឡើងនៅឯប្រទេសជាច្រើនក្នុងតំបន់។ ការបោះឆ្នោតថ្នាក់មូលដ្ឋាននិងការបោះឆ្នោតថ្នាក់ជាតិនៅក្នុងប្រទេសជិតខាង មានផលប៉ះពាល់អវិជ្ជមានទៅលើការកើនឡើងនៃការវាយប្រហារ និងការកើនឡើងនៃការសម្លាប់មនុស្សនៅក្នុងប្រទេសជិតខាងមួយផ្សេងទៀត»។
លោក Mezmur និយាយថា ការវាយប្រហារប្រឆាំងនឹងមនុស្សភឿកមិនមែនជាបញ្ហាដែលប្រទេសតែមួយអាចដោះស្រាយបាននោះទេ។ លោកនិយាយថា វាទាមទារការឆ្លើយតបដែលមានការសហការគ្នាមួយ។
គណៈកម្មាធិការបានជ្រើសយកពិធីទទួលសមាជិកថ្មីនៃប្រទេសបេណាំងនៅក្នុងប្រទេសអាហ្វ្រិកខាងលិច ដើម្បីធ្វើការរិះគន់នេះ។ លោក Mezmur និយាយថា ក្មេងៗ ជាពិសេសក្មេងស្រី ត្រូវបានបង្ខំឲ្យចាកចេញពីគ្រួសារ ហើយនិរទេសទៅវិហារដូនជីដែលគេហៅថា Voodoo។
«នៅក្នុងករណីទាំងនេះ លទ្ធភាពទទួលបានការអប់រំរបស់ពួកគេ ការប្រាស្រ័យទាក់ទងជាមួយគ្រួសារ ការទទូលបានការថែរក្សាសុខភាព និងអ្វីៗផ្សេងៗទៀតគឺស្ទើរតែមិនមាន។ ច្បាស់ណាស់ មានករណីនៃការព្យាបាលជំងឺ ប៉ុន្តែការរំលោភបំពានផ្លូវភេទពិតជាបានបន្តកើតឡើងនៅក្នុងវិហារទាំងនោះមែន»។
គណៈកម្មាធិការកំពុងអំពាវនាវឲ្យរដ្ឋាភិបាលបេណាំង យកក្មេងៗចេញពីវិហារទាំងនោះ ហើយផ្តល់ជំនួយផ្នែកហិរញ្ញវត្ថុ ផ្នែកសង្គម និងផ្នែកចិត្តសាស្រ្ត ដើម្បីជួយពួកគេឲ្យជាសះស្បើយពីបទពិសោធន៍ភ័យខ្លាចទាំងនេះ៕
ប្រែសម្រួលដោយ ប៊ុន ប៉េងហ៊ុយ
