កាលពីសប្តាហ៍មុន អ្នកស៊ើបអង្កេតសិទ្ធិមនុស្សកំពូលម្នាក់របស់អង្គការសហប្រជាជាតិបានធ្វើការជួបប្រជុំជាមួយពួកអ្នកការទូតកូរ៉េខាងជើងអំពីលទ្ធភាពនៃដំណើរបំពេញទស្សនកិច្ចដើម្បីវាយតម្លៃការអនុវត្តសិទ្ធិមនុស្សរបស់ប្រទេសនោះ។ ការចរចានេះកើតមានឡើងនៅពេលដែលកូរ៉េខាងជើងព្យាយាមរារាំងអង្គការសហប្រជាជាតិមិនឲ្យបញ្ជូនរបាយការណ៍ស្ថានភាពសិទ្ធិមនុស្សរបស់ប្រទេសខ្លួនទៅតុលាការឧក្រិដ្ឋកម្មអន្តរជាតិ (ICC)។
ជំនួបកាលពីសប្តាហ៍មុនរវាងលោក Marzuki Darusman អ្នកស៊ើបអង្កេតសិទ្ធិមនុស្សនិងពួកអ្នកការទូតកូរ៉េខាងជើងកើតមានឡើងបន្ទាប់ពីការស៊ើបអង្កេតនាំមុខមួយរបស់លោក Darusman ពីស្ថានភាពសិទិ្ធមនុស្សដ៏ធ្ងន់ធ្ងររបស់ប្រទេសនោះ។ គណៈកម្មការស៊ើបអង្កេតរបស់អង្គការសហប្រជាជាតិបានចេញសេចក្តីរាយការណ៍នៅដើមឆ្នាំនេះ ដែលកត់ត្រាពីប្រព័ន្ធការងារ គុកនយោបាយក្នុងប្រទេសកូរ៉េខាងជើងដែលកំពុងឃុំឃាំងមនុស្ស១សែន២ម៉ឺននាក់ហើយនិងបញ្ជីពីភាពព្រៃផ្សៃដែលរួមមានការកម្ចាត់ ការធ្វើឃាត ការធ្វើទារុណកម្ម ការចាប់ដាក់គុក ការចាប់រំលោភ ការពន្លូតកូនដោយបង្ខំហើយនឹងអំពើហិង្សាខាងផ្លូវភេទផ្សេងៗទៀត។
លោកស្រី Joanna Hosaniak នាយិការងនៃអង្គការសម្ព័ន្ធភាពពលរដ្ឋដើម្បីសិទ្ធិមនុស្សកូរ៉េខាងជើងដែលធ្វើកិច្ចសហប្រតិបត្តិការជាមួយអ្នកស៊ើបអង្កេតរបស់អង្គការសហប្រជាជាតិ បានរាយការណ៍លម្អិតពីទំហំនៃការរំលោភធ្វើបាបនៅក្នុងប្រទេសនោះ។ លោកស្រីមានប្រសាសន៍ថា ប្រភេទនៃការរំលោភធ្វើបាបជាប្រព័ន្ធបានរាលដាល ដែលផ្អែកលើកម្រិតនៃភាពស្មោះត្រង់ដល់ពួកអាជ្ញាធរនៅក្នុងរដ្ឋធានីព្យុងយ៉ាង។
ជនជាតិកូរ៉េខាងជើងរាប់ពាន់នាក់អាចត្រូវគេចាត់ទុកថា ជាសត្រូវ ពីព្រោះតែសមាជិកផ្សេងទៀតរបស់ក្រុមគ្រួសារខ្លួនកាលពីអតីតកាលបានជំទាស់ប្រឆាំងឬមិនបានគាំទ្ររបបនោះ។ បន្ទាប់មកពួកគេត្រូវគេបញ្ជូនទៅកាន់ជំរំការងារដោយបង្ខំដើម្បីធ្វើការងារពី១៦ម៉ោងទៅ១៨ម៉ោងក្នុងមួយថ្ងៃ ហើយត្រូវបានគេផ្តល់របបអាហារតិចតួចបំផុត។
«អ្នកទោសជាច្រើនបានស្លាប់នៅឆ្នាំទី១ដោយសារការបញ្ជូនទៅកាន់ជំរំនោះ ពីព្រោះតែគេត្រូវការចំណាយពេលវេលាដើម្បីសម្របទៅតាមការងារដ៏លំបាកនេះហើយនឹងសម្របទៅតាមកម្រិតចំណីអាហារដែលពួកគេផ្តល់ឲ្យ។ ហើយម្ហូបដែលគេផ្តល់ឲ្យនោះគ្មានជីវជាតិទេ»។
លោក Phil Robertson នាយករងទទួលបន្ទុកតំបន់អាស៊ីរបស់អង្គការសិទ្ធិមនុស្ស Human Rights Watch និយាយថា គណៈកម្មការស៊ើបអង្កេតរបស់អង្គការសិទ្ធិមនុស្ស បង្ហាញពីកម្រិតភាពព្រៃផ្សៃដែលគេមិនបានឃើញចាប់តាំងពីជំរំប្រមូលផ្តុំរបស់ពួក Nazi ក្នុងសង្គ្រាមលោកលើកទី២មក ហើយការណ៍នេះតម្រូវឲ្យមានការឆ្លើយតបជាអន្តរជាតិក្នុងសំឡេងតែមួយ។
«ការណ៍ពិតគឺថា គណៈកម្មការស៊ើបអង្កេតនោះនិយាយយ៉ាងច្បាស់ថា នេះជាការរំលោភសិទ្ធិមនុស្សដែលគ្មានអ្វីប្រៀបប្រដូចបាន ដែលគេទាំងអស់បានដឹងនៅក្នុងរយៈពេល៣០ឬ៤០ឆ្នាំចុងក្រោយនេះ ដែលចង្អុលបង្ហាញថា អង្គការសហប្រជាជាតិត្រូវតែត្រឡប់មកធ្វើតាមគោលបំណងកាលពីដើមវិញដែលត្រូវរារាំងឧក្រិដ្ឋកម្មដ៏ព្រៃផ្សៃនោះ»។
អង្គការសិទ្ធិមនុស្សបានគាំទ្រអនុសាសន៍នៃរបាយការណ៍ដើម្បីកាត់ទោសពួកមន្រ្តីកូរ៉េខាងជើង រួមទាំងមេដឹកនាំ Kim Jong Un ពីបទរំលោភសិទ្ធិមនុស្សនៅឯតុលាការឧក្រិដ្ឋកម្មអន្តរជាតិ។
ពួកអ្នកការទូតកូរ៉េខាងជើង បានប្រកាសប្រឆាំងការប្រមូលចងក្រងសេចក្តីរាយការណ៍នោះថាជាភូតកុហក ប្រឌិតនិងបង្ខូចកេរ្ត៍ឈ្មោះ។
មហាសន្និបាតរបស់អង្គការសហប្រជាជាតិត្រូវគេរំពឹងថា នឹងបោះឆ្នោតលើបញ្ហានេះនៅថ្ងៃទី១៨ ខែវិច្ឆិកានេះ។ ទោះបីប្រទេសភាគច្រើនបោះឆ្នោតកាត់ទោសពួកមន្រ្តីកូរ៉េខាងជើងក៏ដោយ វិធានការនេះទំនងជាត្រូវបានបោះឆ្នោតវ៉េតូដោយប្រទេសចិន ឬរុស្ស៊ីនៅពេលដែលវិធានការនេះត្រូវបញ្ជូនទៅកាន់ក្រុមប្រឹក្សាសន្តិសុខរបស់អង្គការសហប្រជាជាតិ។
ទោះជាយ៉ាងនោះក៏ដោយ លោកស្រី Hosaniak និយាយថា សេចក្តីរាយការណ៍នោះបានទទួលជោគជ័យរួចទៅហើយនៅក្នុងការធ្វើឲ្យពិភពលោកយកចិត្តទុកដាក់លើការរំលោភសិទ្ធិមនុស្សនៅក្នុងប្រទេសកូរ៉េខាងជើង ហើយពិភពលោកបានយកចិត្តទុកដាក់អំពីកូរ៉េខាងជើង ដែលកំពុងពិភាក្សាពីលទ្ធភាពអនុញ្ញាតឲ្យអ្នកស៊ើបអង្កេតរបស់អង្គការសហប្រជាជាតិចូលក្នុងប្រទេសនោះជាលើកដំបូង ប្រសិនបើអង្គការពិភពលោកនេះទម្លាក់ចោលកិច្ចខំប្រឹងប្រែងដើម្បីកាត់ទោសពួកមន្រ្តីរដ្ឋាភិបាលទីក្រុងព្យុងយ៉ាងនោះ។
«ការណ៍នេះ ជាអ្វីដែលធ្វើឲ្យមន្រ្តីកូរ៉េខាងជើងធ្វើការផ្លាស់ប្តូរ ដែលពួកគេមានការភ័យខ្លាចយ៉ាងខ្លាំងពីការគិតរបស់សហគមន៍អន្តរជាតិដែលអាចធ្វើឲ្យពួកគេទទួលខុសត្រូវចំពោះឧក្រិដ្ឋកម្មទាំងនេះ»។
លោក Robertson និយាយទៀតថា នេះជាវិធានការដ៏ល្អលើកទីមួយ ក៏ប៉ុន្តែគេត្រូវការពេលវេលាច្រើនទៀតដើម្បីធ្វើឲ្យសម្រេច។
«នៅពេលដែលមានកម្លាំងពិតប្រាកដ នៅពេលដែលមានការគំរាមពិតប្រាកដដើម្បីធ្វើឲ្យពួកមេដឹកនាំទទួលខុសត្រូវនៅក្នុងប្រទេសកូរ៉េខាងជើង រដ្ឋាភិបាលនឹងមានប្រតិកម្ម ក៏ប៉ុន្តែខ្ញុំមិនជឿភ្លាមៗថា យើងនឹងឃើញការតាំងចិត្តជាដុំកំភួនណាមួយដល់កំណែទម្រង់ដែលនាំឲ្យមានការគោរពសិទ្ធិមនុស្សពិតប្រាកដទេ»។
សកម្មជនទាំងនោះនិយាយថា នេះគ្រាន់តែជាការចាប់ផ្តើមនៃយុទ្ធសាស្រ្តដើម្បីបង្កើនការគាបសង្កត់លើកូរ៉េខាងជើងឲ្យធ្វើការផ្លាស់ប្តូរហើយនឹងបញ្ជូនសារថា ពួកមន្រ្តីដែលពាក់ព័ន្ធក្នុងការរំលោភសិទ្ធិមនុស្សនឹងត្រូវទទួលខុសត្រូវ៕
ប្រែសម្រួលដោយ ជឹង ប៉ូជីន
