ទីប្រឹក្សាសន្តិសុខជាតិស.រ.អា.បាននិយាយថាស.រ.អា. និងប្រទេសចិនបានពិភាក្សាគ្នាយ៉ាងស្មោះត្រង់អំពីការខ្វែងគំនិតគ្នាកាលពីឆ្នាំទៅមិញនៅពេលដែលប្រទេសជាតិទាំងពីរនេះប្រុងប្រៀបសម្រាប់ដំណើរទស្សនៈកិច្ចរបស់លោកប្រធានាធិបតីចិន Xi Jinping នៅក្នុងស.រ.អា.នៅខែក្រោយ។
លោកស្រី Susan Rice កំពុងឋិតនៅក្នុងក្រុងប៉េកាំងដែលនៅទីនោះលោកស្រីបានជួបជាមួយលោកប្រធានាធិបតី Xi Jinping នៅក្រោយលោកស្រីបានធ្វើការចរចាជាមួយលោក Yang Jiechi អ្នកការទូតកំពូលនៃប្រទេសចិន។
លោកស្រីបាននិយាយថា ប្រទេសទាំងពីរទទួលស្គាល់ថាការខ្វែងគំនិតគ្នារវាងប្រទេសទាំងពីរគួរត្រូវដោះស្រាយដោយប្រសិទ្ធិភាព។
លោកប្រធានាធិបតី Xi បានមានប្រសាសន៍ថា លោកទន្ទឹងរង់ចាំ និងបន្តការសន្ទនាគ្នាជាមួយលោកប្រធានាធិបតីស.រ.អា. បារ៉ាក់ អូបាម៉ា ក្នុងខែកញ្ញា។
លោក Xi បានមានប្រសាសន៍ថា «យើងប្រុងប្រៀបនឹងឧបត្ថម្ភផ្ចុងផ្តើមថែមទៀតដល់កិច្ចសហប្រតិបត្តិការដ៏មានប្រយោជន៍របស់យើង ចាត់ចែងដោយមានប្រសិទ្ធិភាពនូវបញ្ហាងាយនាំឱ្យមានវិបត្តិរវាងយើង និងពង្រឹងមិត្តភាពរវាងប្រជារាស្ត្រនៃប្រទេសយើងទាំងពីរផងដែរ»។
លោកប្រធានាធិបតី Xi នឹងអញ្ជើញមកបំពេញទស្សនៈកិច្ចផ្លូវរដ្ឋក្នុងរដ្ឋធានីវ៉ាស៊ីនតោន ដើម្បីជួបជាមួយលោកប្រធានាធិបតីអូបាម៉ា ហើយលោកនឹងថ្លែងសុន្ទរកថាទៅកាន់មហាសន្និបាតអ.ស.ប.នៅក្នុងបូរីញូវយ៉កផងដែរ។ សេតវិមានបាននិយាយថា ការប្រាស្រ័យទាក់ទងគ្នារវាងក្រុមមន្ត្រីស.រ.អា. និងចិនផ្តោតការយកចិត្តទុកដាក់លើការកសាងទំនាក់ទំនងរវាងប្រទេសទាំងពីរឱ្យមានផលប្រយោជន៍ច្រើនជាងមុនថែមទៀត៕