ក្រសួងការបរទេសសហរដ្ឋអាមេរិកបានយល់ព្រមលក់ប្រព័ន្ធពង្រាយគ្រាប់មីនប្រឆាំងរថក្រោះទៅឱ្យកោះតៃវ៉ាន់ ស្របពេលកំពុងមានការគំរាមកំហែងយោធាកាន់តែកើនខ្លាំងឡើងពីប្រទេសចិនដីគោក។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AP។
ក្រសួងការបរទេសអាមេរិកបានបញ្ជាក់កាលពីថ្ងៃពុធកន្លងទៅនេះថា ប្រព័ន្ធភ្នំភ្លើង ឬ Volcano system នេះនិងឧបករណ៍ពាក់ព័ន្ធទាំងអស់ផ្សេងៗទៀត មានតម្លៃប្រមាណ ១៨០ លានដុល្លារអាមេរិក។
ប្រព័ន្ធនេះមានសមត្ថភាពដាក់ពង្រាយគ្រាប់មីនប្រឆាំងរថគ្រោះ ឬមីនប្រឆាំងមនុស្ស ចេញពីរថយន្ត ឬតាមឧត្ថម្ភាគចក្រពីលើអាកាសក៏បានផងដែរ។ នេះជាប្រភេទអាវុធមួយបែប ដែលអ្នកជំនាញជឿថា កោះតៃវ៉ាន់ត្រូវការយ៉ាងខ្លាំង ដើម្បីទប់ទល់នឹងការចូលឈ្លានពានណាមួយពីប្រទេសចិន ដែលអាចកើតមានឡើងក្នុងពេលខាងមុខ។
ក្នុងការបង្ហាញនូវការគំរាមកំហែងរបស់ខ្លួននោះ ចិនបានបញ្ជូនយន្តហោះយោធាចំនួន ៧១ គ្រឿងនិងនាវាចម្បាំង ៧ គ្រឿង នៅក្នុងការបង្ហាញកម្លាំងដោយផ្ទាល់ទៅជិតកោះតៃវ៉ាន់ ក្នុងរយៈពេល ២៤ ម៉ោងចុងក្រោយនេះ ដោយចិនអះអាងថា កោះតៃវ៉ាន់ដែលគ្រប់គ្រងដោយខ្លួនឯងនេះ ជាផ្នែកមួយនៃទឹកដីរបស់ចិនដីគោក។ នេះបើតាមការបញ្ជាក់របស់ក្រសួងការពារជាតិតៃវ៉ាន់ កាលពីថ្ងៃចន្ទកន្លងទៅនេះ។
ការធ្វើទុក្ខបុកម្នេញផ្នែកយោធារបស់ចិនដីគោកទៅលើកោះតៃវ៉ាន់មានសភាពកាន់តែខ្លាំងឡើងក្នុងរយៈពេលប៉ុន្មានឆ្នាំថ្មីៗនេះ ដោយមេដឹកនាំចិនក៏បានប្រើប្រាស់នូវវោហាសាស្ត្រវាយប្រហារតៃវ៉ាន់ផងដែរ ដោយនិយាយថា កោះមួយនេះគ្មានជម្រើសណាផ្សេងក្រៅតែពីទទួលយកនូវការគ្រប់គ្រងរបស់ចិនដីគោកនៅពេលណាមួយនោះ។
ការណ៍នេះបានធ្វើឱ្យគណបក្សកុម្មុយនីស្តដែលកំពុងគ្រប់គ្រងអំណាចក្នុងប្រទេសចិនបង្កើនឥទ្ធិពលវិស័យយោធារបស់ខ្លួន ហើយកងទ័ពរំដោះប្រជាជនចិន បានបញ្ជូនយន្តហោះនិងនាវាចម្បាំងទៅគៀកៗនឹងកោះតៃវ៉ាន់ស្ទើរតែរៀងរាល់ថ្ងៃ។
ក្រសួងការពារជាតិកោះតៃវ៉ាន់និយាយថានៅរវាងម៉ោង ៦ ព្រឹកថ្ងៃអាទិត្យដល់ម៉ោង ៦ ព្រឹកថ្ងៃចន្ទកន្លងទៅនេះ ចិនបានបញ្ជូនយន្តហោះចំនួន ៤៧ គ្រឿង ឆ្លងកាត់ខ្សែបន្ទាត់ចែកច្រកសមុទ្រតៃវ៉ាន់ ដែលជាព្រំដែនទឹកមិនផ្លូវការដែលប្រទេសទាំងពីរបានទទួលស្គាល់ក្នុងពេលកន្លងទៅ។
ទង្វើនេះកើតមានឡើង បន្ទាប់ពីចិនបានក្តៅក្រហាយនឹងខ្លឹមសារខ្លះនៃច្បាប់ចំណាយប្រចាំឆ្នាំនៃការការពារជាតិអាមេរិកនៅក្នុងអ្វីដែលបានក្លាយជាការអនុវត្តបទដ្ឋានប្រឆាំងនឹងប្រទេសចិន។
ប្រទេសចិនក៏បានធ្វើសមយុទ្ធយោធាទ្រង់ទ្រាយធំដែលមានការបាញ់គ្រាប់ពិតៗផងដែរកាលពីខែសីហាកន្លងទៅ នៅក្នុងការឆ្លើយតបទៅនឹងដំណើរទស្សនកិច្ចរបស់ប្រធានរដ្ឋសភាសហរដ្ឋអាមេរិក លោកស្រី Nancy Pelosi ទៅកាន់កោះតៃវ៉ាន់៕
