ក្រសួងអប់រំបានណែនាំដល់គ្រប់អង្គភាព គ្រឹះស្ថានសិក្សា និងអ្នកពាក់ព័ន្ធទាំងអស់ ឱ្យពង្រឹងការប្រើប្រាស់អក្ខរាវិរុទ្ធ និងក្បួនវេយ្យាករណ៍ខ្មែរឱ្យបានត្រឹមត្រូវ ដើម្បីលើកកម្ពស់ការប្រើប្រាស់សំណេរ និងអក្ខរាវិរុទ្ធខ្មែរលើប្រព័ន្ធផ្សព្វផ្សាយ និងតាមទីសាធារណៈ។
សេចក្តីណែនាំស្តីពី«ការលើកកម្ពស់ការប្រើប្រាស់សំណេរ និងអក្ខរាវិរុទ្ធភាសាខ្មែរឱ្យបានត្រឹមត្រូវ» ចេញនៅថ្ងៃទី ២៣ ខែកុម្ភៈ និងត្រូវបានបង្ហោះលើទំព័រហ្វេសប៊ុករបស់ក្រសួងអប់រំកាលពីថ្ងៃអង្គារ មានការណែនាំចំនួន ៨ ចំណុចដល់គ្រប់ស្ថាប័ន និងអ្នកពាក់ព័ន្ធ រួមទាំងមាតាបិតា និងអាណាព្យាបាលសិស្សផងដែរ។
សេចក្តីណែនាំនេះមាន «គោលបំណងលើកកម្ពស់ការប្រើប្រាស់សំណេរ និងអក្ខរាវិរុទ្ធភាសាខ្មែរ នៅលើបណ្តាញផ្សព្វផ្សាយ បណ្តាញទំនាក់ទំនងសង្គម និងនៅតាមទីសាធារណៈ ទាំងក្បួនសរសេរ អក្ខរាវិរុទ្ធ និងវេយ្យាករណ៍ ព្រមទាំងបណ្តុះស្មារតីស្រឡាញ់ និងថែរក្សាអក្សរ និងភាសាជាតិឱ្យបានគង់វង្ស និងរីកចម្រើនថែមទៀត»។
ក្រសួងបានណែនាំដល់គ្រប់អង្គភាពទាំងសាធារណៈ និងឯកជន សិស្សានុសិស្ស យុវជន និងពលដ្ឋ ត្រូវយកចិត្តទុកដាក់ និងខិតខំប្រើប្រាស់ភាសាខ្មែរ ទាំងលើការអាន ការសរសេរ និងការនិយាយឱ្យបានត្រឹមត្រូវតាមអក្ខរាវិរុទ្ធ និងវេយ្យាករណ៍ភាសាខ្មែរគ្រប់ស្ថានភាព ទោះក្នុងបណ្តាញទំនាក់ទំនងសង្គម ឬទំនាក់ទំនងផ្ទាល់ ការផ្សព្វផ្សាយ ឬការចែករំលែកព័ត៌មាន និងការកម្សាន្តណាមួយក្តី។
ក្រសួងក៏បានណែនាំឱ្យអ្នកពាក់ព័ន្ធទាំងអស់ត្រូវជួយជំរុញ និងលើកទឹកចិត្តសិស្ស និស្សិត ឬកូនចៅ លើការអាន និងការសរសេរភាសាខ្មែរឱ្យបានត្រឹមត្រូវ ផុលផុស និងប្រកាន់ទម្លាប់ប្រើប្រាស់អក្សរខ្មែរ សម្រាប់កត់ត្រា និងសរសេរភាសាខ្មែរ និងគួរចៀសវាងការប្រើអក្សរនៃភាសាដទៃជំនួសតួអក្សរខ្មែរ។
វីអូអេមិនទាន់អាចសុំការអត្ថាធិប្បាយបន្ថែមពីអ្នកនាំពាក្យក្រសួងអប់រំ អ្នកស្រី ឃួន វិច្ឆិកា និងលោក កាន់ ពុទ្ធី បាននៅឡើយទេ។
គ្រូបង្រៀនឯកទេសអក្សរសាស្រ្តខ្មែរកម្រិតឧត្តមសិក្សានៅវិទ្យាល័យកំរៀង ខេត្តបាត់ដំបង លោកគ្រូ អួន ស៊ីនិត ប្រាប់វីអូអេថា លោកសាទរចំពោះការចេញសេចក្តីណែនាំរបស់ក្រសួង។
លោកថ្លែងថា៖ «សម្រាប់លោកគ្រូ លោកគ្រូសាទរយ៉ាងខ្លាំងចំពោះការណែនាំរបស់ក្រសួងអប់រំ ពាក់ព័ន្ធនឹងសំណេរ អក្ខរាវិរុទ្ធដែលប្រើប្រាស់ឱ្យត្រឹមត្រូវ ព្រោះនេះជាភាសារបស់ជាតិ អ៊ីចឹងគួរតែមានមោទនភាព នាំគ្នាប្រើប្រាស់។ យើងមិនអាចឱ្យបរទេសមកនិយមប្រើអក្សរភាសារបស់ជាតិយើងបានទេ អ៊ីចឹងមានតែចាប់ផ្តើមពីយើងម្នាក់ៗមានស្មារតីជាតិនិយម។ យើងស្រឡាញ់ យើងចូលចិត្ត យើងប្រើ»។
គ្រូបង្រៀនរូបនេះសង្កេតឃើញថា បច្ចុប្បន្នយុវជនមិនទាន់ប្រើប្រាស់ការសរសេរជាភាសាខ្មែរបានត្រឹមត្រូវនៅឡើយ ប៉ុន្តែលោកនៅតែជំរុញឱ្យមានការប្រើប្រាស់អក្សរជាតិឱ្យត្រឹមត្រូវបន្ថែមទៀត និងថា មិនគាំទ្រជាដាច់ខាតចំពោះការប្រើប្រាស់អក្សរឡាតាំងជាសំនៀងភាសាខ្មែរ។
លោកគ្រូបញ្ជាក់ថា ក្រៅពីការខិតខំយកចិត្តទុកដាក់ណែនាំពីក្រសួង និងភាគីពាក់ព័ន្ធ យុវជនគ្រប់រូបក៏ត្រូវតែចេះប្រើប្រាស់វចនានុក្រមភាសាខ្មែរផងដែរ ដើម្បីធ្វើជាគោលកុំឱ្យមានការសរសេរសំណេរ ឬពាក្យពេចន៍ខុស។
ចំណែកឯនាយកសាលាវិទ្យាល័យ ជា ស៊ីមចំរើនរដ្ឋ នៅភ្នំពេញ លោក ឌី ទេពកោសល្យ ប្រាប់វីអូអេនៅថ្ងៃពុធនេះថា សេចក្តីណែនាំរបស់ក្រសួងស្តីពីការលើកកម្ពស់ការប្រើប្រាស់សំណេរ និងអក្ខរាវិរុទ្ធភាសាខ្មែរនេះ នឹងជួយពង្រឹងការយល់ដឹងបន្ថែមដល់ប្រជាពលរដ្ឋ និងសិស្សានុសិស្ស ឱ្យយកចិត្តទុកដាក់ក្នុងការសរសេរជាភាសាខ្មែរបានត្រឹមត្រូវ។
លោកបញ្ជាក់ថា៖ «ឥឡូវនេះ យើងឃើញជាក់ស្តែងហើយ កុំថាឡើយប្រជាពលរដ្ឋសាមញ្ញ ប្រជាពលរដ្ឋសាមញ្ញជាទូទៅ ការសរសេរសំណេរអីហ្នឹង គាត់អត់សូវខ្វល់ពីអក្ខរាវិរុទ្ធទេ ទាំងភាសាដែលគាត់សរសេរក្នុងបណ្តាញសង្គម ក្នុងហ្វេសប៊ុក ឬក៏សរសេរអក្សរតាមស្លាកយីហោអីផ្សេងៗ។ គាត់ដាក់ធ្វើម៉េចឱ្យតែបាន អានត្រូវ។ អ៊ីចឹងជាទូទៅ ប្រជាពលរដ្ឋលោកអត់សូវខ្វល់ទេពីរឿងសរសេរឱ្យបានត្រឹមត្រូវ។ អាហ្នឹងទី១។ ទី២ ក្នុងសាលារៀនវិញ សិស្សភាគីច្រើនសរសេរអត់ទាន់ត្រឹមត្រូវទេ»។
នាយកសាលារូបនេះថា ក្រៅពីសំណូមពរឱ្យប្រជាពលរដ្ឋយកចិត្តទុកលើការណែនាំនេះ លោកនឹងណែនាំដល់លោកគ្រូ អ្នកគ្រូគ្រប់មុខវិជ្ជាទាំងអស់ក្នុងសាលារបស់លោកឱ្យអនុវត្តទៅតាមការណែនាំរបស់ក្រសួង និងពង្រឹងការណែនាំដល់សិស្សានុសិស្សបន្ថែមតាមថ្នាក់នីមួយៗ។
ក្រសួងអប់រំ យុវជន និងកីឡាបានអំពាវនាវឱ្យគ្រប់ស្ថាប័នពាក់ព័ន្ធ អាជ្ញាធរមានសមត្ថកិច្ច អាជ្ញាធរមូលដ្ឋាន មហាជន និងអ្នកពាក់ព័ន្ធទាំងអស់ ជួយណែនាំ ជួយត្រួតពិនិត្យ និងកែសម្រួលលើការប្រើប្រាស់សំណេរ និងអក្ខរាវិរុទ្ធភាសាខ្មែរក្នុងការដាក់តាំង និងផ្សព្វផ្សាយគ្រប់ទម្រង់ នៅតាមទីសាធារណៈ ឬតាមបណ្តាញទំនាក់ទំនងសង្គមនានា៕
វេទិកាបញ្ចេញមតិ