លោកប្រធានាធិបតីតួកគី Recep Tayyip Erdogan បានមានប្រសាសន៍កាលពីថ្ងៃពុធថា ជនសង្ស័យម្នាក់ដែលត្រូវបានគេសង្ស័យថាជាអ្នកបោកគ្រាប់បែកអត្តឃាតនៅក្នុងការវាយប្រហារភេរវកម្មដ៏ប្រល័យនៅក្នុងរដ្ឋធានីប្រ៊ុចសែល ធ្លាប់ត្រូវបានគេឃុំឃាំងនៅក្នុងប្រទេសតួកគី និងបាននិរទេសទៅកាន់អឺរ៉ុប ហើយជនសង្ស័យរូបនោះត្រូវបានគេដោះលែងប្រហែល៨ខែមុន។
លោក Erdogan បានមានប្រសាសន៍ថា រដ្ឋាភិបាលរបស់លោកបានព្រមានដល់អាជ្ញាធរក្នុងប្រទេសប៊ែលហ្ស៊ិកអំពីឈ្មោះ Ibrahim el-Bakraoui នេះ ដែលត្រូវបានឃុំឃាំងនៅប៉ែកខាងត្បូងប្រទេសតួកគីក្បែរទីក្រុង Gaziantep ដែលជាប់ព្រំប្រទល់ជាមួយនឹងប្រទេសស៊ីរី។ លោកប្រធានាធិបតីតួកគីបាននិយាយថាឈ្មោះ el-Bakraoui នេះ ត្រូវបានគេនិរទេសចេញពីប្រទេសតួកគីកាលពីខែកក្កដា ប៉ុន្តែបន្ទាប់មកត្រូវបានគេដោះលែងទៅវិញ «បើទោះបីជារដ្ឋាភិបាលរបស់លោកបានព្រមានថា ជននេះគឺជាភេរវករបរទេសក៏ដោយ»។
លោក Erdogan បានថ្លែងថា ក្រុមអាជ្ញាធរដែលបានឃុំខ្លួនឈ្មោះ el-Bakraoui នេះមិនអាចរកឃើញខ្សែបណ្តាញអ្វីដែលថា រូបគេជាប់ពាក់ព័ន្ធជាមួយនឹងភេរវកម្មឡើយ ដូច្នេះហើយទើបពួកគេដោះលែងជនសង្ស័យជនជាតិប៊ែលហ្ស៊ិកវ័យ២៩ឆ្នាំរូបនេះ។
លោកប្រធានាធិបតីតួកគីបានបន្តថា តាមពិតឈ្មោះ el-Bakraoui នេះត្រូវបាននិរទេសទៅកាន់ប្រទេសហូឡង់តាមសំណើរបស់គេផ្ទាល់ ប៉ុន្តែលោកប្រធានាធិបតីមិនបានបញ្ជាក់ថាតើជននោះបានធ្វើដំណើរពីហូឡង់ទៅប៊ែលហ្ស៊ិកនៅពេលណាឬដោយមធ្យោបាយណានោះទេ។
ថ្លែងទៅកាន់អ្នកសារព័ត៌មានក្នុងទីក្រុងអង់ការ៉ាកាលពីថ្ងៃពុធ លោក Erdogan មិនបានលើកឡើងពីឈ្មោះ el-Bakraoui ទេ ប៉ុន្តែព័ត៌មានដែលបានធ្លាក់ដល់ដៃប្រព័ន្ធផ្សព្វផ្សាយតួកគីបានកំណត់អត្តសញ្ញាណថា ភេរវកររូបនេះត្រូវបានគេនិរទេសចេញ ហើយបន្ទាប់មកក៏ត្រូវបានគេដោះលែង។
ក្រុមអាជ្ញាធរក្នុងរដ្ឋធានីប្រ៊ុចសែល ដែលនៅទីនោះគេបានគោរពវិញ្ញាក្ខន្ធរបស់ជនរងគ្រោះដោយការស្មឹងស្មាធមួយនាទីកាលពីថ្ងៃពុធ បានបញ្ជាក់ថាឈ្មោះ Ibrahim el-Bakraoui វ័យ២៩ឆ្នាំរូបនេះ បានបំផ្ទុះគ្រាប់បែកនិងបានស្លាប់កាលពីថ្ងៃអង្គារនៅឯអាកាសយានដ្ឋានធំបំផុតនៅក្នុងរដ្ឋធានីប្រ៊ុចសែល។
ប្អូនប្រុសរបស់ជននេះដែលមានវ័យ២៧ឆ្នាំ ឈ្មោះ Khalid បានបោកគ្រាប់បែកអត្តឃាតនៅក្នុងរថភ្លើងមួយក្នុងរដ្ឋធានីប្រ៊ុចសែលក្នុងពេលប្រហែលគ្នានេះដែរ។ ជនទាំង២រូបនេះត្រូវបានគេកំណត់អត្តសញ្ញាណតាមរយៈស្នាមក្រយ៉ៅដៃរបស់ពួកគេ៕
